Xnews — ақпарат агенттігі Әлем және Қазақстанның соңғы жаңалықтары
Түркістан қаласының әкімі Әзімбек Пазылбекұлының төрағалығымен кезекті аппараттық мәжіліс өтті. Жиында III тоқсан қорытындысы бойынша рейтингтік индикаторлық көрсеткіштердің орындалуы, жыл соңына дейінгі болжамды нәтижелер мен қала аумағында анықталған кемшіліктер қаралды.
Экономика және қаржы бөлімінің басшысы Олжас Бөлегенов негізгі көрсеткіштердің орындалу барысы туралы баяндады.
Қала әкімі жыл соңына дейін жоспарлы межеге қол жеткізу үшін жауапты бөлімдерге салықтық түсімдер мен бюджет кірістерін арттыру, әкімшілік айыппұлдарды өндіріп алу, тұрғындарды міндетті әлеуметтік медициналық сақтандыру жүйесімен қамту және кәмелетке толмағандар арасындағы құқық бұзушылықтардың алдын алу жұмыстарын күшейтуді тапсырды.
Сондай-ақ, Ұлттық сапа орталығының зертханалық тексеруі нәтижесінде жол сапасына қатысты анықталған кемшіліктерді екі апта ішінде жою міндеттелді. Инвестиция тарту, кәсіпкерлік пен туризмді дамыту бағытында да нақты жобалар әзірлеу тапсырылды.
Мәжілісте сондай-ақ, қала аумағында анықталған кемшіліктер бойынша жауапты бөлімнің есебі тыңдалды.
Жиын қорытындысында қала әкімі барлық тапсырмалардың сапалы әрі уақытылы орындалуын, ал индикаторлық көрсеткіштердің жыл соңына дейін толық қамтамасыз етілуін қатаң бақылауға алуды тапсырды.
