Xnews — ақпарат агенттігі Әлем және Қазақстанның соңғы жаңалықтары
Қоғамның тұрақты дамуы мен ұлт болашағы ең алдымен отбасы институтының беріктігіне байланысты. Сондықтан жаңа конституциялық өзгерістерде неке, отбасы, ана, әке және бала мәселесіне ерекше мән беріліп, оларды мемлекеттік қорғаудың нақты құқықтық тетіктері айқындалды.
Ата Заңның 30-бабының 1-тармағында «Неке және отбасы, ана, әке мен бала мемлекет қорғауында болады» деп нақты көрсетілген. Бұл норма отбасы құндылықтарын қорғауды мемлекеттік саясаттың басым бағыты ретінде бекітеді.
Конституцияға сәйкес, неке – еркек пен әйелдің заңға сәйкес тіркелген ерікті әрі тең құқықты одағы. Мұндай құқықтық айқындау қоғамдағы дәстүрлі отбасы моделін сақтауға және отбасы мүшелерінің құқықтарын қорғауға мүмкіндік береді.
Мемлекеттік қорғау нақты тетіктер арқылы жүзеге асырылады. Атап айтқанда:
– әлеуметтік жәрдемақылар мен төлемдер;
– ана мен баланы қолдау бағдарламалары;
– білім беру және денсаулық сақтау саласындағы кепілдіктер.
Осылайша, мемлекет отбасының әл-ауқатын арттыруды тек әлеуметтік міндет ретінде емес, ұлттық қауіпсіздік пен демографиялық саясаттың маңызды бөлігі ретінде қарастырады.
Сонымен қатар, Конституция ата-аналардың балаға қамқорлық жасау және оны тәрбиелеу құқығын ғана емес, міндетін де нақтылайды. Бұл қағида баланың жан-жақты дамуына жағдай жасауға, оның қауіпсіздігін қамтамасыз етуге және құқықтарын қорғауға бағытталған.
Кәмелетке толған еңбекке қабілетті балалардың еңбекке жарамсыз ата-анасына қамқорлық жасау міндетінің бекітілуі – отбасы ішіндегі өзара жауапкершілік пен сыйластықты құқықтық тұрғыда нығайтудың көрінісі.
Қорытындылай келе, жаңа Конституциядағы отбасыға қатысты нормалар әлеуметтік тұрақтылықты қамтамасыз етуге, ұлттық құндылықтарды сақтауға және берік қоғам қалыптастыруға бағытталған жүйелі саясаттың айқын дәлелі болып табылады.
