Xnews — ақпарат агенттігі Әлем және Қазақстанның соңғы жаңалықтары
Еңбек жолын табандылықпен қалыптастырып, саланың дамуына өз үлесін қосып келе жатқан тәжірибелі мамандардың бірі – Бекенов Ғалымжан Маханұлы. Ол әрдайым істің сапасы мен жауапкершілікті басты орынға қойып, кәсіби өсу жолын үздіксіз жалғастырып келе жатқан жан.
Бекенов Ғалымжан Маханұлы 1974 жылы 15 сәуірде Шымкент қаласында дүниеге келді. 1992 жылы орта мектепті тәмамдап, еңбекке ерте араласқан ол техникалық салаға деген қызығушылығын кәсіби жолға бағыттады.
2002-2003 жылдары «Энергоцентр-3» акционерлік қоғамында жылу бекеттеріне қызмет көрсететін 3-дәрежелі слесарь ретінде еңбек жолын бастады. Өзінің еңбекқорлығы мен ұқыптылығының арқасында 2003-2004 жылдары «Жылуэнергоорталық» ЖШС-де де осы дәрежедегі слесарь қызметін атқарып, тәжірибесін шыңдады.
2004-2015 жылдары «3-Энергоорталық» АҚ құрамында жылу бекеттеріне қызмет көрсететін слесарь әрі сорғы қондырғыларының машинисі болып қызмет етті. Бұл жылдар оның кәсіби тұрғыдан қалыптасуына үлкен мектеп болды.
2015 жылдан бері «Қуатжылуорталық-3» мекемесінде жұмыс істеп келеді. Алдымен №1 аудандық бөлімшесінің сорғы қондырғыларының 3-дәрежелі машинисі қызметіне қабылданып, біліктілігінің арқасында қазір апаттық-диспетчерлік қызметтің жылу желілеріне қызмет көрсететін 5-дәрежелі слесарь ретінде абыроймен еңбек етуде.
Ғалымжан Маханұлының әр жұмыс учаскесіндегі ұқыптылығы, техникалық сауаттылығы мен жауапкершілікке беріктігі – жас мамандарға үлгі. Ол өз еңбегімен жылу жүйесінің тұрақты жұмысын қамтамасыз етіп, қала инфрақұрылымының сенімді қызмет етуіне үлес қосып келеді.
Кәсіби адалдық пен үздіксіз даму – Ғалымжан Маханұлының басты ұстанымы. Еңбегі елдің игілігіне жарай берсін!
Еске салсақ, Мемлекет басшысы Қасым-Жомарт Тоқаев Қазақстан халқына Жолдауында кәсіби білім беру жүйесін реформалаудың маңыздылығы туралы мәлімдеген еді.
«Мен 2025 жылды Жұмысшы мамандықтары жылы деп жариялаймын. Осы уақыт ішінде техникалық және кәсіби білім беру жүйесін реформалау қажет. Сондай-ақ біз жұмысшы мамандықтарын дәріптеу арқылы қоғамда еңбекқор және нағыз маман болу идеясын насихаттаймыз».
Мемлекет басшысы адал әрі табанды еңбегімен табысқа жеткен адамдар қашанда құрметті, сыйлы болуы керек екенін қадап айтты.
«Бұл біз ұсынып отырған «Адал азамат – Адал еңбек – Адал табыс» қағидатына толық сай келеді. Бір сөзбен айтқанда, біздің қоғамда еңбекқорлық, кәсібилік сияқты қасиеттер өте жоғары бағалануға тиіс. Өз кәсібін жетік меңгерген мамандар ұлт сапасын арттырады. Сондықтан біз еңбек адамының мәртебесін көтеріп жатырмыз. Бұл бағыттағы жұмыс тоқтамайды, жалғаса береді.
Жұмыстың жаманы жоқ, кез келген еңбек – қадірлі. Ең бастысы, әркім жауапкершілікті терең сезініп, өз міндетін сапалы атқаруға тиіс. Сонда ғана еліміз дамудың сара жолына түседі. Халқымызда «Жұмыстың көзін тапқан байлықтың өзін табады» деген сөз бар. Кәсібіне адал әрі жауапкершілікпен қараған адам қашанда лайықты бағасын алады. Бұл түсінікті қоғам санасына сіңіру қажет. Азаматтарға құрметті атақ берудегі түпкі мақсатымыз да – осы. Бұған дейін мұғалімдерге, дәрігерлерге және мәдениет қайраткерлеріне осындай атақтар беріле бастады. Бұл – өте жақсы бастама, оның аясын кеңейту керек», — деді Президент.
Ал, Мемлекет Басшысы Конгресс-холға жиналған жергілікті қауым алдында сөйлеген сөзінде шаһарға жұмыс сапарымен арнайы келгенін, шырайлы Шымкент еліміз үшін өте маңызды қала, тарихы терең қастерлі мекен екенін жеткізді.
«Халқымыз Шымкентті шырайлы шаһар деп атайды. Расында, бұл жердің ауа райы да, адамдары да өте керемет, ерекше деп айтуға болады. Қала тұрғындары өте еңбекқор, таза, іскер азаматтар. Осы жерде отырған әр азаматтың еңбегі мол. Мен баршаңызға шын көңіліммен ризашылығымды білдіремін.
Менің бірер жыл бұрын Шымкент халқымен кездескенім естеріңізде болар. Сол кезде айтқан сөзімді тағы да қайталап өткім келеді: «Береке дегеніміз – экономика, ал ынтымақ дегеніміз – саясат». Шын мәнінде, осы екі құндылық елімізді алға бастайды. Мұны Шымкенттің бүгінгі келбетіне қарап айтуға да болады», — деп айтқан еді.
Шымкент қаласының Өңірлік коммуникациялар қызметі
