Шымкентте бірнеше әлеуметтік нысандар мен инфрақұрылым жобаларының жай-күйі тексерілді

Шымкент қаласының әкімі білім беру мекемелеріндегі және қала аумағындағы бірқатар инфрақұрылым нысандарында жүргізіліп жатқан жұмыстардың барысымен танысты. Атап айтқанда, қала басшысы Ақпан батыр атындағы №10 жалпы орта мектеп (594 орын) пен №99 мектеп-гимназиясында (600 орын) жүргізіліп жатқан күрделі жөндеу жұмыстарының сапасын бақылады. Қазіргі таңда №10 мектептегі жөндеу жұмыстары толық аяқталған. Ал №99 мектеп-гимназиясында соңғы әрлеу және монтаждау кезеңі жүргізілуде.

Әкім екі білім мекемесінің де жаңа оқу жылына дейін оқушыларды жаңартылған, заманауи және жайлы ортада қабылдауы тиіс екенін атап өтті. Жауапты мердігер ұйымдарға жөндеу сапасын қатаң бақылауға алу, жұмыстарды белгіленген мерзімде аяқтау және көгалдандыру аумағына автоматты суару жүйесін орнату жөнінде нақты тапсырмалар берілді.

Сонымен қатар, Әл-Фараби және Тұран аудандарындағы бірқатар заңсыз құрылыс нысандарын сүру барысы тексерілді. Асқаров көшесі мен Абай атындағы саябақ маңында орналасқан нысандардың заң талаптарына сәйкес бұзылып жатқанына көз жеткізілді.

Аралау барысында әкім Жандосов көшесін Шаймерденов көшесінен Қонаев даңғылына дейінгі аралықта жүргізіліп жатқан абаттандыру жұмыстарымен де танысты. Анықталған кемшіліктер бойынша мердігер мекемеге оларды жою және барлық жұмысты сапалы әрі мерзімінде аяқтау жөнінде нақты міндеттер жүктелді. Қаланың әлеуметтік және инфрақұрылымдық дамуы алдағы уақытта да тұрақты бақылауда болады.

Шымкентте қаланың инженерлік инфрақұрылымын дамыту бойынша жүйелі жұмыс жалғасуда. Қала әкімі Ғабит Сыздықбеков тұрғындармен бірге Жұлдыз /жаңа құрылыс аумағы/ және Жалын тұрғын алаптарында табиғи газды қосуға қатысты.

Айта кетейік, газ құбырларының құрылысы өткен жылдың тамыз айында тұрғындармен көшпелі кездесулер кезінде айтылған өтініштері бойынша басталған болатын. Бүгін Жұлдыз шағынауданында 834 абонент және Жалын шағынауданында 566 абонент көгілдір отынға қол жеткізді.

Жалпы 33 шақырымнан астам газ құбыры салынды. Осының арқасында екі тұрғын алабы да орталықтандырылған газ жүйесіне қосылды.

Қала әкімі тұрғындардың көптен күткен қуанышына ортақтасып, мердігерлерге жұмыстарды сапалы және уақтылы орындағаны үшін алғыс айтты.

Айта кету керек, газға қосылу үшін тұрғындар техникалық шарттарды алуға өтініш беруі керек. Мұны «eGov Mobile» қосымшасы немесе электрондық үкіметтің веб-сайты egov.kz. арқылы жасауға болады.

Шымкент қаласы әкімінің баспасөз қызметі