Xnews — ақпарат агенттігі Әлем және Қазақстанның соңғы жаңалықтары
Қазақстанда Құрылтайдың құрылуы – елдің саяси жүйесін жаңғырту жолындағы маңызды қадам. Бір палаталы Парламентке көшу заң шығару үдерісін жетілдіріп, мемлекеттік басқарудың тиімділігін арттыруға мүмкіндік береді. Сонымен бірге бұл өзгеріс өңірлердің үнін естіртіп, қоғамның өзекті мәселелерін заңнамалық деңгейде көтеруге жол ашады.
Қазіргі таңда ел дамуының әр саласында нақты шешімдер мен сапалы сараптамаға сұраныс жоғары. Осы тұрғыдан алғанда, ғылыми-сараптамалық топтардың жұмысы айрықша маңызға ие. Өңірлердегі сарапшылардың ұсыныстары қоғам мен мемлекеттік институттар арасындағы байланысты нығайтып, халықтың сұранысына сай шешімдер қабылдауға ықпал етеді.
Құрылтай құрамында 145 депутаттың болуы ел өңірлерінің мүддесін кеңінен қамтуға мүмкіндік береді. Әр аймақтың ерекшелігі мен тұрғындардың талап-тілегі заң шығару барысында ескерілгені маңызды. Мұндай жүйе ел көлемінде қордаланған мәселелерге жедел назар аударып, олардың шешімін табуға ықпал етеді.
Елдің болашағы ең алдымен білім мен ғылымның дамуына байланысты. Білімді, білікті әрі бастамашыл азаматтар – мемлекеттің басты капиталы. Сондықтан ғылымды дамыту, сапалы маман даярлау және жастардың әлеуетін ел игілігіне бағыттау ұлттық дамудың негізгі басымдықтарының бірі болуы керек.
«Ұлттық рухани жаңғыру» қағидаты да осы ұстаныммен сабақтас. Ол тарихымызға, мәдени мұрамызға және ұлттық құндылықтарымызға жаңаша көзқараспен қарауға мүмкіндік беріп отыр. Қазақстанда жүзеге асырылып жатқан реформалар да азаматтардың әл-ауқатын арттыруға және қоғамның орнықты дамуына бағытталған.
Әділетті қоғам құру үшін әр азаматтың өз қабілетін жүзеге асыруына мүмкіндік болуы қажет. Мемлекет тарапынан жасалған қолдау адамның білімін жетілдіруіне, кәсіби тұрғыда өсуіне және еңбек нарығында өз орнын табуына жол ашады. Ал мұндай мүмкіндік қоғамның әлеуметтік әлеуетін күшейтеді.
Экономиканы дамытуда өңірлердің ерекшелігін ескеру де маңызды. Ауыл шаруашылығы, өнеркәсіп, инфрақұрылым және жаңа технологиялар бағытында заманауи шешімдер қажет. Бұл ретте ғылым мен өндірістің байланысын күшейтіп, отандық ІТ-технологияларды дамытуға, жаңа жұмыс орындарын ашуға және білікті кадрлар даярлауға басымдық берілуі тиіс.
Құрылтай құрамына тәжірибелі мамандармен қатар, өз саласында нақты нәтижеге қол жеткізген практиктер мен жаңашыл азаматтардың келуі де маңызды. Себебі қоғамдағы мәселелерді шешу үшін тек теориялық білім емес, нақты тәжірибе де қажет.
Бүгінгі Қазақстан үшін бірлік пен әділдік, азаматтық жауапкершілік пен еңбек, ғылым мен кәсіпкерлік сияқты құндылықтардың маңызы зор. Елдің тарихи-мәдени мұрасын сақтау, табиғи байлықтарды ұқыпты пайдалану, медицина мен экологияны дамыту, энергия үнемдеу және технологиялық әлеуетті арттыру – ұлттық дамудың негізгі бағыттарының қатарында.
Құрылтай осы басымдықтарды жүзеге асыруға үлес қосып, қоғам мен мемлекеттің арасындағы байланысты одан әрі нығайта алады. Оның жұмысының нәтижелілігі ел азаматтарының сенімін арттырып, Қазақстанның тұрақты әрі орнықты дамуына жаңа серпін береді.
Шолпан ТОРҒАУТОВА,
Ө.Жәнібеков атындағы Оңтүстік Қазақстан педагогикалық университетінің III курс докторанты, Шымкент қаласындағы «Қоғамдық келісім» ғылыми-сараптамалық тобының мүшесі
