Шымкентте заманауи музыкалы-лазерлі субұрқақ ашылды

Бүгін, Шымкент қаласының Өңірлік коммуникациялар қызметі ақпарат алаңында өткен брифингте, Шымкент қаласы әкімдігінің ресми өкілі, қала әкімінің орынбасары – Сәрсен Абайұлы Құранбек төмендегідей мәлімдеме жасады.

Мегаполистегі «Көл» демалыс аймағында заманауи музыкалы-лазерлі субұрқақ салтанатты түрде іске қосылды. Жаңа нысан қала көркін одан әрі ашып, қарқынды дамудың символы ретінде ерекше әсер қалдырады.

Бұл – Шымкенттегі лазерлік, жарық және отты шоуды біріктірген алғашқы кешенді субұрқақ. Жарық, музыка және отты көріністер кешкі және түнгі мезгілде тамаша үйлесіп, тұрғындар мен қала қонақтарына ерекше әсер сыйлайды.

Субұрқақта заманауи жүйе орнатылған: ол қалыпты ырғақтағы музыкалық композицияларды да, лазер сәулелі динамикалық шоуларды да орындай алады. Барлық техникалық элементтер шетелде әзірленіп, монтаждау кезінде энерготиімді шешімдер мен автоматты басқару жүйелері қолданылды. Бұл субұрқақтың жұмысын оңтайландырып, күтіп-ұстау шығындарын азайтуға мүмкіндік береді.

Жаңа нысанның жұмыс кестесі:
• 18:00–18:20
• 19:00–19:20
• 20:00–20:20
• 21:00–21:20
• 22:00–22:20

Көрермендерге ерекше су қойылымы ұсынылады. Субұрқақтар маусымы ресми аяқталғанымен, қала тұрғындары мен қонақтары бірегей қойылымды алдағы жылы күндері тамашалай алады. Одан кейін нысан қысқы маусымға сақтауға қойылып, келесі көктемде қайта іске қосылады.

«Көл» демалыс аймағындағы субұрқақтың ашылуы – қаладағы демалыс инфрақұрылымын дамыту және жайлы ортаны арттыруға бағытталған кешенді абаттандырудың маңызды кезеңі. Әсемдік, технология және қолайлылықты үйлестірген жаңа кешен бүгіннен бастап Шымкент тұрғындары мен қонақтарының қызығушылығын тудырды және алдағы уақытта мегаполистің көрікті орындарының біріне айналатыны сөзсіз.

Қалада қысқы демалыс аймақтары мен мұз сырғанақтары ашылады

Шымкент қаласында тұрғындардың қысқы демалысын тиімді өткізу мақсатында ашық аспан астындағы мұз айдындарын ұйымдастыру жұмыстары басталды. Қала аумағында екі үлкен мұз алаңы жеке кәсіпкерлердің бастамасымен салынбақ.

Бірінші мұз айдыны Байтұрсынов көшесі бойындағы Спорт сарайы жанында орналасады. Бұл жобаны «Europrom» жауапкершілігі шектеулі серіктестігі өз есебінен жүзеге асырады.
• Мұз алаңының көлемі – 550 м² (34х17 метр);
• Ай сайын келушілер саны шамамен 20–30 мың адам болуы күтілуде;
• Тоңазытқыш жабдығының энергия тұтынуы – 400 кВт/сағ (іске қосу кезінде – 800 кВт/сағ);
• Су тұтыну көлемі – айына 40–60 м³.

Екінші мұз айдыны Арбат аллеясында орналастырылмақ. Бұл нысанды «Mega Most Construction» компаниясы салуды жоспарлап отыр.
• Мұз алаңының көлемі – 1830 м² (150х12,5 метр);
• Ай сайын келушілер саны 50–60 мың адам шамасында;
• Тоңазытқыш жабдығының энергия тұтынуы – 400 кВт/сағ (іске қосу кезінде – 800 кВт/сағ);
• Су тұтыну көлемі – айына 80–100 м³.

Қазіргі таңда аталған жобалар бойынша жеке кәсіпкерлермен келіссөздер жүргізілуде.

Бұл бастама – қала тұрғындары мен қонақтарына қолжетімді әрі қауіпсіз қысқы демалыс аймақтарын ұсынуға, сонымен қатар мегаполистің спорттық және мәдени өмірін жандандыруға бағытталған.

Шымкенттіктер қаланы дамытуға QR-код арқылы ұсыныс білдіре алады

Шымкент қаласында тұрғындардың пікірін тікелей ескеруге бағытталған жаңа жоба іске қосылды. Қала әкімі Ғабит Сыздықбековтің бастамасымен қолға алынған «Шымкентті дамытуға халықтың үлесі» жобасы енді әрбір тұрғынға қаланың дамуына қатысты өз ойы мен ұсынысын оңай әрі жылдам жеткізуге мүмкіндік береді.

Бұған дейін қала әкімінің тұрғындармен кездесуі мен шаһарды аралауы кезінде көптеген ұсыныстар айтылып келген болса, енді бұл пікірлер арнайы жүйе арқылы қабылданады. Алдағы уақытта қоғамдық орындар мен автобустарда QR-кодтар орнатылып, сол арқылы тұрғындар қаланы көркейтуге арналған идеяларын жолдай алады.

Әкім Ғабит Әбдімәжитұлының айтуынша, бұл бастама — әрбір азаматқа Шымкенттің дамуына өз үлесін қосып, оң өзгерістердің бір бөлігі болуға мүмкіндік береді. Түскен ұсыныстардың барлығы мұқият сараланып, ең өзекті әрі пайдалы бастамалар нақты жүзеге асырылмақ.

Жоба — әкімдік пен халық арасындағы ашық диалогты нығайтуға, сондай-ақ ортақ күш біріктіре отырып, қаланың өркендеуіне үлес қосуға бағытталған маңызды қадам.

Толығырақ: https://www.youtube.com/live/tdctUfs06IU?si=S4aLAUl9S6s-D-4L

Шымкент қаласының Өңірлік коммуникациялар қызметі