Xnews — ақпарат агенттігі Әлем және Қазақстанның соңғы жаңалықтары
Шымкент қаласында 2025 жылғы шомылу маусымында азаматтардың қауіпсіздігін қамтамасыз ету мақсатында кешенді алдын алу шаралары жүргізілді. Бұл туралы Шымкент қаласы төтенше жағдайлар департаментінің Төтенше жағдайдарды жою басқармасының инженері, азаматтық қорғау капитаны Шәріп Асқар Рысбекұлы БАҚ өкілдеріне арналған брифинг барысында хабарлады.
Қаланың климаттық ерекшеліктеріне байланысты су айдындарында адамдардың қауіпсіздігін сақтау – департаменттің басым бағыттарының бірі. Осы мақсатта судағы төтенше жағдайлардың алдын алу шаралары сәуір айынан бастап белсенді түрде қолға алынған.
Шомылу маусымында қауіпсіздікті қамтамасыз ету мәселесі қалалық төтенше жағдайлардың алдын алу және жою жөніндегі комиссия отырысында қаралып, нақты тапсырмалар берілді. Сондай-ақ, қала әкімінің 16 сәуірдегі №1785 қаулысымен «Шомылу кезіндегі азаматтардың қауіпсіздігін қамтамасыз ету жөніндегі іс-шаралар жоспары» бекітілді.
Қала аумағында суға шомылуға арналған бес ресми орын анықталған. Оның үшеуінде шомылуға рұқсат етілген: Тоғыс су қоймасындағы «Холодильник», Бадам су қоймасындағы «Рахат Бадам» және Қошқар ата өзенінің бастауы. Сонымен қатар, суға түсуге тыйым салынған 13 орын белгіленіп, оларға 200 ескерту тақтайшалары орнатылды, бұл өткен жылмен салыстырғанда 29 пайызға артық.
Жалпы қала бойынша аквасаябақтар мен бассейндерде, демалыс аймақтарында «Судағы қауіпсіздік» тақырыбында тұрақты түрде түсіндіру шаралары ұйымдастырылды. Мектептерде 52 мыңнан астам оқушы қамтылып, 225 интерактивті сабақ өткізілді. Сондай-ақ білім беру ұйымдарында арнайы стендтер орнатылып, ата-аналарға арналған ақпараттық хабарламалар мен бейнероликтер әлеуметтік желілер арқылы таратылды.
Қауіпсіздік бағытындағы түсіндіру жұмыстары аясында «Атамекен» Ұлттық кәсіпкерлер палатасында бассейн және аквапарк иелерінің қатысуымен дөңгелек үстел өтті. Сонымен қатар, әлеуметтік осал отбасылардың 1400-ден астам балалары суға шомылуға тегін мүмкіндік алды.
Судағы қауіпсіздік – баршаға ортақ жауапкершілік
Шомылу маусымында Шымкент қаласының төтенше жағдайлар департаменті бұқаралық ақпарат құралдарымен және әлеуметтік желілер арқылы түсіндіру жұмыстарын жүйелі жүргізді.
Қала тұрғындарына арнап телеарналардан 54 сөз сөйлеу, баспасөз беттерінде 37 мақала жарияланып, әлеуметтік желілерде 229 ақпараттық материал орналастырылды. Бұдан бөлек, қаланың ірі сауда орталықтары мен қоғамдық орындарындағы LED-экрандарда «Судағы қауіпсіздік» және «Жазғы кезеңдегі қауіпсіздік» тақырыбындағы бейнероликтер көрсетілді.
Қауіпсіздік шараларының аясында 195 рет рейд ұйымдастырылып, 38 мыңнан астам үгіт-насихат парақшалары таратылды. Әкімшілік құқық бұзушылық кодекстің 412-бабы бойынша судағы қауіпсіздік ережесін бұзған 6 жеке тұлғаға жалпы сомасы 165 мың теңгеден астам айыппұл салынды.
Сонымен қатар, қала тұрғындарының мобильді телефондарына «112» қызметі арқылы күнделікті ескерту хабарламалары жіберіліп отырды. Бұл шаралар азаматтардың судағы қауіпсіздік ережелерін сақтауға назарын арттыруға бағытталды.
Дегенмен, кейбір мәселелер әлі де өзекті. ТЖД мәліметінше, тұрғындардың ережелерге немқұрайлы қарауы, балаларды қараусыз қалдыру фактілері жиі кездеседі. Сондай-ақ, «Рахат-Бадам» демалыс орнында су аттракциондарының жағажайға тым жақын орналасуы қосымша қауіп тудыратыны айтылды.
Осыған байланысты Департамент тарапынан аудандық әкімдіктерге Бадам өзеніндегі шлюздерге бейнебақылау камераларын орнату мүмкіндігін қарастыруды және су аттракциондарын демалушылар аймағынан алшақ орналастыруды ұсынды.
Жылыту маусымының басталуына орай қауіпсіздік шаралары түсіндірілді
Шымкент қаласында ағымдағы жылы төтенше жағдайлар департаменті мен аудандық әкімдіктердің бірлескен жұмысы аясында қауіпсіздік шаралары күшейтіліп, тұрғындар арасында алдын алу түсіндіру жұмыстары тұрақты жүргізілуде. Қаламызда ағымдағы жылы газдан улану жағдайлары тіркелген жоқ.
2025 жылғы 28 тамызда қала әкімінің бірінші орынбасары А.Кәрімов «2025–2026 жылдардағы жылыту маусымына дайындық жоспарын» бекіткен болатын. Осы жоспар негізінде қала аумағындағы әлеуметтік осал топтағы 1 073 отбасы (Абай – 280, Әл-Фараби – 62, Еңбекші – 370, Қаратау – 129, Тұран – 232) есепке алынды. Бұл санатқа көпбалалы, аз қамтылған, мүмкіндігі шектеулі азаматтар мен жалғызбасты зейнеткерлер кіреді.
Өрт қауіпсіздігі айлығы аясында осал топтағы тұрғын үйлерге профилактикалық түсіндіру жұмыстары толық көлемде жүргізілді. Қайта аралау іс-шаралары да жалғасуда. Нәтижесінде 901 үй иесі мамандарды қабылдаған, 109 үйге кіру мүмкін болмаған, ал 63 үйде тұрғындар болмаған. Жалпы 901 тұрғын үйде 5 895 адам қамтылып, өрт қауіпсіздігі мен улы газдан уланудың алдын алу бойынша кеңес берілді.
Сонымен қатар, тұрғын үйлерге 88 дана газоанализатор орнатылып, 40-тан астам үйдің түтін мұржалары тазартылды. Жалпы жылыту маусымы алдында қала бойынша 10 767 тұрғын үй араланып, 25 683 адамға түсіндіру жұмыстары жүргізілді.
Қауіпсіздік мәдениетін қалыптастыру мақсатында қала аумағындағы LED экрандарда («Отау», «BuyPark», «Mega», «ЦУМ», «Shymkent Plaza», «Фиркан City», «Мечта.kz», «Shymkent City Mall», «Diamond Plaza», «Наурыз парк», «Heper Haus», «Аль-Фараби» және басқа да сауда орталықтарында) қысқа метражды бейнероликтер көрсетілуде. Сонымен қатар, білім беру ұйымдарында 18 ашық сабақ өткізіліп, оқушылар мен студенттерге арналған танымдық бейнежазбалар көрсетілді.
Толығырақ: https://www.youtube.com/live/QFrNSSuocig?si=bdriy8rtKdbWG519
Шымкент қаласының Өңірлік коммуникациялар қызметі
