Xnews — ақпарат агенттігі Әлем және Қазақстанның соңғы жаңалықтары
Арбат алаңында Жұмысшы мамандықтар жылы мен Еңбек күніне орай «Еңбек – елдің мұраты» атты өңіраралық бос жұмыс орындары жәрмеңкесі ұйымдастырылды. Қала әкімінің орынбасары Берік Беркімбаев тұрғындарды атаулы күнмен құттықтап, «Еңбек жолы – 2025» конкурсы жеңімпаздарын марапаттады. Жәрмеңкеде 371 мекемеден 2285 тұрақты, 918 мекемеден 2118 уақытша жұмыс орны ал, солтүстік өңірлерден 6 039 бос жұмыс орны ұсынылды.
Сондай-ақ іс-шараға пробация есебінде тұрған, бас бостандығынан айыру орындарынан босатылған, мүгедектігі бар және алимент берешегі бар азаматтар да қатысты.
Жалпы жәрмеңкеге 500-ге жуық адам келіп, 91-і тұрақты жұмысқа, 13 тұрғын субсидияланатын орынға, 11-і әлеуметтік осал топтар санатымен жұмысқа жолданды. 8 борышкерге жұмыс ұсынылды. Қоныс аудару бойынша 108 адамға кеңес берілді.
Қалған қатысушыларға кәсіптік оқыту, қайтарымсыз грант алу шарттары бойынша кеңес берілді.
Еске салсақ, Мемлекет басшысы Қасым-Жомарт Тоқаев Қазақстан халқына Жолдауында кәсіби білім беру жүйесін реформалаудың маңыздылығы туралы мәлімдеген еді.
«Мен 2025 жылды Жұмысшы мамандықтары жылы деп жариялаймын. Осы уақыт ішінде техникалық және кәсіби білім беру жүйесін реформалау қажет. Сондай-ақ біз жұмысшы мамандықтарын дәріптеу арқылы қоғамда еңбекқор және нағыз маман болу идеясын насихаттаймыз».
Мемлекет басшысы адал әрі табанды еңбегімен табысқа жеткен адамдар қашанда құрметті, сыйлы болуы керек екенін қадап айтты.
«Бұл біз ұсынып отырған «Адал азамат – Адал еңбек – Адал табыс» қағидатына толық сай келеді. Бір сөзбен айтқанда, біздің қоғамда еңбекқорлық, кәсібилік сияқты қасиеттер өте жоғары бағалануға тиіс. Өз кәсібін жетік меңгерген мамандар ұлт сапасын арттырады. Сондықтан біз еңбек адамының мәртебесін көтеріп жатырмыз. Бұл бағыттағы жұмыс тоқтамайды, жалғаса береді.
Жұмыстың жаманы жоқ, кез келген еңбек – қадірлі. Ең бастысы, әркім жауапкершілікті терең сезініп, өз міндетін сапалы атқаруға тиіс. Сонда ғана еліміз дамудың сара жолына түседі. Халқымызда «Жұмыстың көзін тапқан байлықтың өзін табады» деген сөз бар. Кәсібіне адал әрі жауапкершілікпен қараған адам қашанда лайықты бағасын алады. Бұл түсінікті қоғам санасына сіңіру қажет. Азаматтарға құрметті атақ берудегі түпкі мақсатымыз да – осы. Бұған дейін мұғалімдерге, дәрігерлерге және мәдениет қайраткерлеріне осындай атақтар беріле бастады. Бұл – өте жақсы бастама, оның аясын кеңейту керек», — деді Президент.
