ҚР Премьер-Министрі Асқар Мамин жұмыс сапары аясында Шымкент пен Түркістан қалаларының көлік және әлеуметтік-мәдени инфрақұрылым нысандарының құрылыс барысын тексерді, деп хабарлайды Xnews Премьер-Министрдің ресми сайтына сілтеме жасап.
Шымкентте Үкімет басшысына биылғы желтоқсанға дейін салу көзделген, өткізу қабілеті сағатына 2 мың жолаушыны құрайтын халықаралық әуежайдың жаңа жолаушылар терминалының құрылыс барысы туралы баяндалды.
Премьер-Министр Түркістанда жаңа халықаралық әуежайдың және оған апаратын автомобиль жолының құрылыс қарқынымен танысты. Нысан облыс орталығынан 16 шақырым жерде орналасқан және биылғы қыркүйек айында пайдалануға беріледі. Терминалдың өткізу қабілеті жылына 3 млн жолаушыны құрайды деп көзделген.
![](https://primeminister.kz/assets/media/sh-05434.jpg)
А. Мамин Конгресс-холдың, 7 мың орынға шақталған стадионның, Оқушылар сарайының, бассейні бар спорт кешенінің, аттракциондары бар қала саябағының, драма театрының, облыстық ғылыми-әмбебап кітапхананың, «Ұлы дала елі» орталығының, Қ. А. Ясауи музейінің және Тұңғыш Президент саябағының құрылыс алаңдарында болып, Ұлы Жібек жолы қолөнершілерінің ұлттық орталығының ғимаратын реконструкциялау барысын тексерді.
![](https://primeminister.kz/assets/media/sh-05457.jpg)
Үкімет басшысы әрқайсысы 120 бөлмеден тұратын «Rixos Turkestan» және «Hampton by Hilton» қонақүйлерінің, сондай-ақ «Sembol construction» түрік компаниясы салып жатқан «Керуен сарай» көпфункционалды туристік кешенінің құрылысы барысымен танысты. Аталған барлық қонақ үй-туристік нысандарын осы жылы пайдалануға беру жоспарда бар.
![](https://primeminister.kz/assets/media/sha-3288.jpg)
Премьер-Министрге «Әзірет Сұлтан» музей-қорығын абаттандыру жоспары таныстырылды.