Қазақ спортына өлшеусіз үлес қосқан Бекет Махмұтов өмірден өтті

Бокстан Қазақстан Республикасының еңбек сіңірген жаттықтырушысы, самбодан КСРО спорт шебері, Халықаралық бокс федерациясының (АІВА) бұрынғы вице-президенті, Қазақстан бокс федерациясының және Қазақстан дзюдо федерациясының президенті Бекет Сапабекұлы Махмұтов 81 жасқа қараған шағында дүниеден өтті.

Қазақстан Ұлттық Олимпиадалық комитетінің президенті Тимур Құлыбаев ауыр қазаға байланысты марқұмның отбасына көңіл айтты.

«Қазақстан спорты үлкен қазаға ұшырады. Белгілі қоғам қайраткері, спортшы әрі бапкер Бекет Сапабекұлы Махмұтов өмірден өтті. Еліміздегі ең құрметті спорт атқамінерлерінің бірі және қоғам қайраткері бар өмірін отандық спортты дамытуға арнады. Ол ұзақ жылдар бойы Қазақстан әуесқой бокс федерациясын басқарып, Халықаралық федерацияда басшылық қызмет атқарған алғашқы қазақстандық өкіл санатына енді, сонымен қатар, дзюдо федерациясын басқарды. Бекет Сапабекұлының басшылығымен қазақстандық бокс әлемдік аренада нық қадам басқан болатын. Оның қолдауы, кәсіби шеберлігі және спортқа деген сүйіспеншілігінің арқасында отандық боксшылар Олимпиада ойындары мен өзге де ірі жарыстарда үлкен жетістікке жетті. Өзімнің және Қазақстан Ұлттық Олимпиадалық комитетінің, сондай-ақ, еліміздегі барлық спорттық қоғамдастық атынан Бекет Сапабекұлы Махмұтовтың өмірден өтуіне байланысты марқұмның жақындары мен туыстарына және барша әріптестеріне қайғырып көңіл айтамын.», — делінген жеделхатта. 

Пікір қалдыру

Сіздің почтаңыз көрінбейді. Толтыру міндетті *

*