Xnews — ақпарат агенттігі Әлем және Қазақстанның соңғы жаңалықтары
Шымкент қаласының әкімі Мұрат Әйтенов цифрландыру басқармасының басшысы Әсет Абдірахановтың 9 айда атқарған есебін тыңдады. Қалада базалық станциялар орнату жұмысы 2020 жылы үш кезең негізінде қолға алынған.
Алғашқы кезеңде қалада 11 нүктеге станция орнатылып, мобильді интернетпен қамту көрсеткіші 82% құрады.
Осы жылы интернетпен қамтудың ІІ-кезеңінде 14 нүктеге базалық станциясын орнату жұмысы жүруде. Оның 8-і инвестор есебінен, 6 нүкте байланыс операторлары жеке нысан иелерімен бірлесе атқаруда. Қазір 8 жерге (Тассай, Ынтымақ-2, Қайнарбұлақ, Солтүстік-Батыс, Аэропорт маңы, А-2 трассасы, Р-32 трассасы Құрсай №49 мектеп маңы) антенна-мачталық құрылғы орнатылып, электр энергиясына жалғау жұмыстары жүргізілуде.
Жыл соңына дейін желіге қосылады. Қалған 6 нүктеде (Абдулабад,Забадам,Асар,Самал-3, Нұртас, Құрсай — Жылысай көшесі маңы) базалық станциялар орнатылып, іске қосылған. Қала аумағындағы 14 базалық станциялар толық желіге қосылса, 136 071 отбасы сапалы интернетпен қамтылады.
Жыл соңына дейін желімен қамту көрсеткішін 91%-ға жеткізу жоспарланып отыр. Қалада базалық станцияны көбейту үшін басқарма Өңіраралық байланыс инспекциясымен бірлесе интернеттің сапасына талдау жасаған. Талданған 110 нүктенің 22-не интернет сапасы төмен екені анықталған. Әзірленген Жол картасы шеңберінде сапасы төмен аумақтарға 2022-2023 жылдары базалық станциясын орнату жоспарланып отыр.
Бұл жұмыстар жүзеге асырылса, қала аумағы 100% сапалы интернетпен қамтылады.
