Xnews — ақпарат агенттігі Әлем және Қазақстанның соңғы жаңалықтары
Достық үйінде орналасқан №4 сайлау учаскесінде сайлау процесі ұйымдасқан түрде өтіп жатыр. Мұнда сайлау комиссиясының 7 мүшесі және саяси партиялардан келген 8 байқаушы жұмыс істеуде. Учаскеде барлығы 881 сайлаушы тіркелген. Олардың арасында қозғалысы шектеулі бір азамат бар. Мұндай сайлаушылар үшін қосымша жарықтандыруы, компьютер және көру қабілетін жақсартуға арналған арнайы құралдары бар бұрыш жабдықталған.
№4 сайлау учаскесінің төрайымы Қызылгүл Құлбаеваның айтуынша, сайлаушылардың көңіл күйі жақсы, ешқандай келеңсіз жағдай тіркелмеген. Сағат 11:00-ге дейін сайлаушылардың шамамен 20 пайызы дауыс берген.
«Сайлаушылардың көңіл күйі өте жақсы. Ешқандай жанжал болған жоқ. Тәжірибеге сүйенсек, азаматтардың басым бөлігі сағат 12:00 мен 16:00 аралығында сайлау учаскесіне келеді», – деді Қызылгүл Құлбаева.
Аталған учаскеде Шымкенттің бірқатар белгілі азаматтары да тіркелген. Солардың бірі – Бекет Тұрғараев, Қазақстанның еңбек сіңірген қайраткері, Қазақстанның еңбек сіңірген заңгері, заң ғылымдарының докторы.
Ол азаматтарды сайлауға қатысуға шақырып, Қазақстан тарихында өтіп жатқан алғашқы Құрылтай сайлауының маңызына тоқталды.
«Сайлауға келу қажет. 15 наурызда Қазақстанның жаңа Конституциясы қабылданды. Ата Заңда Құрылтай құру туралы норма бекітілді. Құрылтай – Қазақстан халқының тарихында қалыптасқан халық билігінің институты. Біздің ата-бабаларымыз мемлекетті басқару мәселесін Құрылтайда шешкен. Қасым-Жомарт Тоқаев Құрылтайдың халқымыз үшін маңызы мен тарихи мәнін ескере отырып, оны билік органы ретінде қайта құруды ұсынған болар. Халық бұл шешімді жақсы қабылдады», – деді Бекет Тұрғараев.
Сайлау учаскесіне еңбек ардагерлерімен бірге Шымкент қаласы Ардагерлер кеңесінің өкілдері мен кәсіподақ жетекшілері де келді.
Шымкент қаласы аумақтық кәсіподақтар бірлестігінің төрағасы Бауыржан Алтеев 23 тамыздың барлық қазақстандықтар үшін және елдің одан әрі дамуы үшін маңызды күн екенін атап өтті.
«Бүгін – барлық қазақстандықтар үшін аса маңызды күн. Бұл күн Қазақстан тарихында ел дамуының келесі кезеңіне ықпал ететін шешімдер қабылданған күн ретінде қалатыны сөзсіз. Бүгін еліміздің әлеуметтік-экономикалық, саяси және мәдени дамуының бағыты таңдалады.
Құрылтай – заңдар мен ел үшін аса маңызды шешімдер қабылдайтын жоғары орган. Ол экономикалық өсімге және Қазақстанның халықаралық аренадағы саяси ықпалын арттыруға жол ашады.
Құрылтайдың тарихи сабақтастық тұрғысынан да маңызы зор. Өйткені ата-бабаларымыз ең маңызды шешімдерді Құрылтайда қабылдаған. Сондықтан әрбір қазақстандық осы күні қабылданып жатқан шешімдердің маңызын түсініп, ортақ болашағымыз үшін дауыс беруі керек деп есептеймін. Мен өз таңдауымды жасадым», – деді қалалық кәсіподақ қозғалысының жетекшісі.
