Xnews — ақпарат агенттігі Әлем және Қазақстанның соңғы жаңалықтары
Ташкент қаласында Қазақстан мен Өзбекстанның мемлекеттік органдарының, бизнес қауымдастықтарының, салалық қауымдастықтардың, даму институттарының және кәсіпкерлерінің қатысуымен Қазақстан–Өзбекстан бизнес-форумы өтті.
Форумның негізгі мақсаты – екі ел арасындағы сауда-экономикалық байланыстарды одан әрі нығайту, инвестициялық ынтымақтастықты кеңейту, өндірістік кооперацияны дамыту және өзара тиімді бірлескен жобаларды іске асыруға жаңа серпін беру.
Іс-шараға «Атамекен» ҚР Ұлттық кәсіпкерлер палатасы Төралқасының төрағасы Қанат Шарлапаев қатысып, Қазақстан мен Өзбекстан арасындағы стратегиялық экономикалық әріптестікті тереңдетудің, бизнес үшін қолайлы жағдай қалыптастырудың және өңіраралық кооперацияны кеңейтудің маңыздылығын атап өтті.
Сондай-ақ форум жұмысына «Атамекен» ҚР ҰКП Түркістан облысы бойынша директоры Асылан Ибадуллаев қатысып, Түркістан облысынан келген 40 кәсіпкермен бірге өңірдің инвестициялық және өндірістік әлеуетін таныстырып, өзара тиімді серіктестік орнатуға бағытталған B2B кездесулер мен келіссөздерге қатысты.
Форум аясында делегация Өзбекстанның жетекші өнеркәсіптік кәсіпорындарын аралады. Атап айтқанда, TEXNOPARK көпсалалы индустриялық кешені, Zelal Textile заманауи тоқыма фабрикасы, ARCA Mebel халықаралық жиһаз орталығы және жоғары технологиялық CRAFERS кондитерлік фабрикасының өндірістік әлеуетімен танысып, инновациялық өндіріс үдерістері мен өндірістік кооперацияның жаңа мүмкіндіктерін зерделеді.
