Xnews — ақпарат агенттігі Әлем және Қазақстанның соңғы жаңалықтары
Түркістан облысына жұмыс сапары аясында «Әділет» партиясының сайлауалды штабы өңірдің спорт қауымдастығы өкілдерімен – кәсіби спортшылармен, еңбек сіңірген жаттықтырушылармен, спорт федерацияларының басшыларымен және ұлттық спорт түрлерінің ардагерлерімен кездесті.
Басқосу Бекзат Саттарханов атындағы спорт кешенінде ашық диалог форматында өтті. Жиын барысында ұлттық спорт түрлерін дамыту, заманауи спорт инфрақұрылымын салу, жаттықтырушыларды қолдау, спорт резервін даярлау және өңірлерде спортпен шұғылдануға қолайлы жағдай жасау мәселелері талқыланды.
«Әділет» партиясының төрағасы, Республикалық сайлауалды штабтың жетекшісі Айбек Дәдебай ұлттық спорт түрлерінің мәдени мұраны сақтау мен жас ұрпақты тәрбиелеудегі маңызына тоқталды.
«Әрине, Түркістан – ұлттық болмысымыздың алтын бесігі. Бұл өңірде салт-дәстүр де, ұлттық тәрбие де табиғи қалпында сақталған. Сол құндылықтардың бірегей көрінісі – ұлттық спорт. Сондықтан ұлттық спортты дамыту – тек спорт саласының міндеті емес. Бұл – ұлттық бірегейлікті сақтау, жастарды тәрбиелеу және қоғамның ішкі тұтастығын нығайту мәселесі. Сол себепті бұл саланы дамыту дегеніміз – спортшыларға жағдай жасаумен шектелмейді. Бұл – жаттықтырушылардың мәртебесін көтеру, спорт инфрақұрылымын жетілдіру, ұлттық спорт мектептерін қолдау, ауылдағы талантты жастарға жол ашудан басталады», — деді Айбек Дәдебай.
«Дала қырандары» қозғалысының жетекшісі, «Әділет» партиясынан Құрылтай депутаттығына кандидат Мәди Рымжановтың айтуынша, спорт адамның тек физикалық дайындығын ғана емес, өмірлік ұстанымдарын да қалыптастырады.
«Мен спорттың адамға медальдан әлдеқайда көп нәрсе беретінін өз тәжірибемнен білемін. Ол мінезді қалыптастырады, тәртіпке баулиды әрі жеңілістен кейін қайта еңсе тіктеуге үйретеді. Біз спортпен айналысу әр адамның өмір салтына айналғанын, спортшы еңбегі лайықты бағаланғанын, жаттықтырушылардың еңбегі құрметтелгенін және әрбір баланың өз қабілетін ашуға мүмкіндік алғанын қалаймыз», — деді Мәди Рымжанов.
Республикалық сайлауалды штабтың мүшесі, Құрылтай депутаттығына кандидат Жанарбек Әшімжан ұлттық спортты дамыту мемлекеттік саясаттың басым бағыттарының бірі болғанымен, салада әлі де жүйелі шешімді қажет ететін мәселелер бар екенін айтты.
«Мәселен, орталықтар мен өңірлердегі инфрақұрылымдардың жеткіліксіздігі. Ауылдық жерлерде көкпар, аударыспақ, жамбы ату, теңге ілу сияқты спорт түрлеріне арналған арнайы алаңдар мен сәйгүлікке арналған базаларды заманауи негізде жасақтау. Қаржыландырудың теңсіздігін реттеу. Атап айтқанда олимпиадалық спорт түрлерімен салыстырғанда ұлттық спортқа бөлінетін қаржы көлемі төмен, өңірлер арасында едәуір айырмашылық бар. Сондықтан Үкіметтің бюджет жобасына тиісті мемлекеттік органдармен келісе отырып осы бағытта нақты түзетулер ұсынылады. Білікті бапкерлер мен төрешілердің, жас мамандардың салаға келуін қамтамасыз ету және оны шешу жолдары», — деді Жанарбек Әшімжан.
Сайлауалды бағдарлама аясында партия «Дене шынықтыру және спорт туралы» Қазақстан Республикасының заңына жеті негізгі бағыт бойынша өзгерістер енгізуді ұсынады. Атап айтқанда, бюджет қаражатын пайдалану тиімділігін арттыру, жоғары жетістіктер спортын қаржыландырудың ашықтығын күшейту, бұқаралық және балалар спортын дамытуға басымдық беру, ұлттық және олимпиадалық емес спорт түрлерін қолдау тетіктерін жетілдіру, спорт федерациялары қызметінің ашықтығын күшейту, спорттағы жемқорлық тәуекелдерін азайту, сондай-ақ спортшылар мен жаттықтырушылардың құқықтық мәртебесін нақтылау ұсынылады.
Кездесу қорытындысы бойынша спорт қауымдастығының өкілдері ұлттық спорт түрлерін дамыту, спорт инфрақұрылымын жетілдіру және жаттықтырушылар қауымдастығын қолдау жөніндегі ұсыныстарын сайлауалды штабқа табыстады. Түскен барлық бастама тіркеліп, партияның Республикалық сайлауалды штабында қарауға қабылданды.
