Xnews — ақпарат агенттігі Әлем және Қазақстанның соңғы жаңалықтары
Тоқсанбаев Талғат Ташкенбайұлы – жылу энергетикасы саласында ұзақ жылғы тәжірибесі бар, техникалық сауаты жоғары, өз ісіне ұқыпты және жауапты маман.
Ол 1991–2002 жылдары жалпы білім беретін орта мектепте оқып, кейін еңбек жолын осы салада жалғастырды. 2004 жылдан бастап «3-Энергоорталық» акционерлік қоғамында жылу жүйелеріне қызмет көрсететін және жөндеу жұмыстарын жүргізетін слесарь ретінде жұмыс істеп, бұл қызметті 15 жыл бойы үздіксіз әрі абыроймен атқарды.
2019 жылдан бері «Қуатжылуорталық-3» мемлекеттік коммуналдық кәсіпорнының «К-24» қазандығында 5-дәрежелі жөндеуші слесарь болып еңбек етіп келеді. Талғат Ташкенбайұлы жылу қазандығындағы техникалық жүйелердің тұрақты жұмысын қамтамасыз етіп, апатсыз әрі сапалы қызметтің орындалуына өз үлесін қосып жүр.
Көпжылдық еңбек тәжірибесі мен кәсіби шеберлігі арқасында ұжым арасында сенім мен құрметке ие. Өндіріс орнындағы еңбек тәртібіне адалдығы мен жоғары жауапкершілігі жас мамандарға үлгі боларлық.
Жылу жүйесінің тұрақты жұмыс істеуі – білікті мамандардың тынымсыз еңбегінің жемісі.
Еске салсақ, Мемлекет басшысы Қасым-Жомарт Тоқаев Қазақстан халқына Жолдауында кәсіби білім беру жүйесін реформалаудың маңыздылығы туралы мәлімдеген еді.
«Мен 2025 жылды Жұмысшы мамандықтары жылы деп жариялаймын. Осы уақыт ішінде техникалық және кәсіби білім беру жүйесін реформалау қажет. Сондай-ақ біз жұмысшы мамандықтарын дәріптеу арқылы қоғамда еңбекқор және нағыз маман болу идеясын насихаттаймыз».
Мемлекет басшысы адал әрі табанды еңбегімен табысқа жеткен адамдар қашанда құрметті, сыйлы болуы керек екенін қадап айтты.
«Бұл біз ұсынып отырған «Адал азамат – Адал еңбек – Адал табыс» қағидатына толық сай келеді. Бір сөзбен айтқанда, біздің қоғамда еңбекқорлық, кәсібилік сияқты қасиеттер өте жоғары бағалануға тиіс. Өз кәсібін жетік меңгерген мамандар ұлт сапасын арттырады. Сондықтан біз еңбек адамының мәртебесін көтеріп жатырмыз. Бұл бағыттағы жұмыс тоқтамайды, жалғаса береді.
Жұмыстың жаманы жоқ, кез келген еңбек – қадірлі. Ең бастысы, әркім жауапкершілікті терең сезініп, өз міндетін сапалы атқаруға тиіс. Сонда ғана еліміз дамудың сара жолына түседі. Халқымызда «Жұмыстың көзін тапқан байлықтың өзін табады» деген сөз бар. Кәсібіне адал әрі жауапкершілікпен қараған адам қашанда лайықты бағасын алады. Бұл түсінікті қоғам санасына сіңіру қажет. Азаматтарға құрметті атақ берудегі түпкі мақсатымыз да – осы. Бұған дейін мұғалімдерге, дәрігерлерге және мәдениет қайраткерлеріне осындай атақтар беріле бастады. Бұл – өте жақсы бастама, оның аясын кеңейту керек», — деді Президент.
Ал, Мемлекет Басшысы Конгресс-холға жиналған жергілікті қауым алдында сөйлеген сөзінде шаһарға жұмыс сапарымен арнайы келгенін, шырайлы Шымкент еліміз үшін өте маңызды қала, тарихы терең қастерлі мекен екенін жеткізді.
«Халқымыз Шымкентті шырайлы шаһар деп атайды. Расында, бұл жердің ауа райы да, адамдары да өте керемет, ерекше деп айтуға болады. Қала тұрғындары өте еңбекқор, таза, іскер азаматтар. Осы жерде отырған әр азаматтың еңбегі мол. Мен баршаңызға шын көңіліммен ризашылығымды білдіремін.
Менің бірер жыл бұрын Шымкент халқымен кездескенім естеріңізде болар. Сол кезде айтқан сөзімді тағы да қайталап өткім келеді: «Береке дегеніміз – экономика, ал ынтымақ дегеніміз – саясат». Шын мәнінде, осы екі құндылық елімізді алға бастайды. Мұны Шымкенттің бүгінгі келбетіне қарап айтуға да болады», — деп айтқан еді.
Шымкент қаласының Өңірлік коммуникациялар қызметі
