Еңбек майталманы – ел мақтанышы

Сатвалдиев Ғанихан Акрамұлы – техникалық салада ұзақ жыл еңбек етіп келе жатқан, тәжірибесі мол, өз ісіне адал маман. Еңбек өтілі – 13 жыл.

1986–1990 жылдары ол Шымкент гидромелиоративтік-құрылыс техникумында «Ауыл шаруашылық және азаматтық құрылыс» мамандығы бойынша білім алып, құрылыс және инженерлік жүйелер саласының қыр-сырын меңгерді.

Еңбек жолын 1990 жылы бастап, 1990–1997 жылдары «Жылумен жабдықтау жүйелерін пайдалану және жөндеу жөніндегі Шымкент облыстық өндіріс бірлестігінде» жылу желілерінің жабдықтарын жөндеуші слесарь және қазандық операторы қызметтерін атқарды.

1998–2002 жылдары «Шымкентжылу» Бақылау-акционерлік қоғамында қазандық жабдықтарының слесарі ретінде жұмыс істеді. Өзінің ұқыптылығы мен техникалық сауаттылығының арқасында әріптестерінің сеніміне ие болды.

2004–2005 жылдары «3-Энергоорталық» АҚ-да 3-дәрежелі машинист болып еңбек етті.

2012 жылдан бері «Қуатжылуорталық-3» МКК Нұрсат аудандық бөлімшесінде жылу жүйелеріне қызмет көрсететін 5-дәрежелі слесарь болып жұмыс істейді. Ол жылу желілерінің үздіксіз және сапалы жұмыс істеуін қамтамасыз етіп, тұтынушыларға жылы әрі жайлы жағдай жасауға өз үлесін қосып келеді.

Ғанихан Акрамұлы ұжымда өз еңбегімен, қарапайымдылығымен және жауапкершілігімен ерекшеленеді. Жас мамандарға үлгі болып, өз тәжірибесін үйретуден жалықпайды.

Адал еңбек – оның өмірлік ұстанымы, ал кәсібіне деген сүйіспеншілік – ең үлкен жетістігі.

Еске салсақ, Мемлекет басшысы Қасым-Жомарт Тоқаев Қазақстан халқына Жолдауында кәсіби білім беру жүйесін реформалаудың маңыздылығы туралы мәлімдеген еді.
«Мен 2025 жылды Жұмысшы мамандықтары жылы деп жариялаймын. Осы уақыт ішінде техникалық және кәсіби білім беру жүйесін реформалау қажет. Сондай-ақ біз жұмысшы мамандықтарын дәріптеу арқылы қоғамда еңбекқор және нағыз маман болу идеясын насихаттаймыз».

Мемлекет басшысы адал әрі табанды еңбегімен табысқа жеткен адамдар қашанда құрметті, сыйлы болуы керек екенін қадап айтты.

«Бұл біз ұсынып отырған «Адал азамат – Адал еңбек – Адал табыс» қағидатына толық сай келеді. Бір сөзбен айтқанда, біздің қоғамда еңбекқорлық, кәсібилік сияқты қасиеттер өте жоғары бағалануға тиіс. Өз кәсібін жетік меңгерген мамандар ұлт сапасын арттырады. Сондықтан біз еңбек адамының мәртебесін көтеріп жатырмыз. Бұл бағыттағы жұмыс тоқтамайды, жалғаса береді.

Жұмыстың жаманы жоқ, кез келген еңбек – қадірлі. Ең бастысы, әркім жауапкершілікті терең сезініп, өз міндетін сапалы атқаруға тиіс. Сонда ғана еліміз дамудың сара жолына түседі. Халқымызда «Жұмыстың көзін тапқан байлықтың өзін табады» деген сөз бар. Кәсібіне адал әрі жауапкершілікпен қараған адам қашанда лайықты бағасын алады. Бұл түсінікті қоғам санасына сіңіру қажет. Азаматтарға құрметті атақ берудегі түпкі мақсатымыз да – осы. Бұған дейін мұғалімдерге, дәрігерлерге және мәдениет қайраткерлеріне осындай атақтар беріле бастады. Бұл – өте жақсы бастама, оның аясын кеңейту керек», — деді Президент.

Ал, Мемлекет Басшысы Конгресс-холға жиналған жергілікті қауым алдында сөйлеген сөзінде шаһарға жұмыс сапарымен арнайы келгенін, шырайлы Шымкент еліміз үшін өте маңызды қала, тарихы терең қастерлі мекен екенін жеткізді.
«Халқымыз Шымкентті шырайлы шаһар деп атайды. Расында, бұл жердің ауа райы да, адамдары да өте керемет, ерекше деп айтуға болады. Қала тұрғындары өте еңбекқор, таза, іскер азаматтар. Осы жерде отырған әр азаматтың еңбегі мол. Мен баршаңызға шын көңіліммен ризашылығымды білдіремін.

Менің бірер жыл бұрын Шымкент халқымен кездескенім естеріңізде болар. Сол кезде айтқан сөзімді тағы да қайталап өткім келеді: «Береке дегеніміз – экономика, ал ынтымақ дегеніміз – саясат». Шын мәнінде, осы екі құндылық елімізді алға бастайды. Мұны Шымкенттің бүгінгі келбетіне қарап айтуға да болады», — деп айтқан еді.

Шымкент қаласының Өңірлік коммуникациялар қызметі