Тәжірибелі маман сапалы қызметтің кепілі

Шымкент қаласының коммуналдық саласында көп жылдан бері еңбек етіп келе жатқан білікті мамандардың бірі Ахмадиев Салават Наильевич. Ол өзінің кәсіби жолын 1980-1983 жылдары СПТУ-136 оқу орнында «электрогазбен дәнекерлеуші» мамандығын меңгеруден бастады. Алған білімін өндірісте ұштастырып, еңбекке ерте араласқан маман 1987-1988 жылдары Шымкент мақтап-мата комбинатында слесарь және сылақшы қызметтерін атқарды.

Келесі жылдары ол «Средазстроймонтаж» ұйымында сылақшы болып жұмысын жалғастырып, 1991-1998 жылдар аралығында «Южказэнерго» өндірістік жөндеу мекемесінде 5-дәрежелі электрогазбен дәнекерлеуші ретінде еңбек етті.

2018 жылдан бері «Қуатжылуорталық-3» МКК-нің №4 аудандық бөлімшесінде 5-дәрежелі дәнекерлеуші қызметін атқарып келеді. Өз ісіне жауапкершілікпен қарайтын, тәжірибесі мол маман ретінде Салават Наильевич ұжым арасында да зор құрметке ие. Қаланың инженерлік инфрақұрылымын сапалы әрі қауіпсіз ұстауда оның еңбегі айрықша. Көпжылдық тәжірибесі мен кәсіби біліктілігі Салават Наильевичтің коммуналдық саладағы тұрақты дамуға өз үлесін қосып келе жатқанын көрсетеді.

Еске салсақ, Мемлекет басшысы Қасым-Жомарт Тоқаев Қазақстан халқына Жолдауында кәсіби білім беру жүйесін реформалаудың маңыздылығы туралы мәлімдеген еді.
«Мен 2025 жылды Жұмысшы мамандықтары жылы деп жариялаймын. Осы уақыт ішінде техникалық және кәсіби білім беру жүйесін реформалау қажет. Сондай-ақ біз жұмысшы мамандықтарын дәріптеу арқылы қоғамда еңбекқор және нағыз маман болу идеясын насихаттаймыз».

Мемлекет басшысы адал әрі табанды еңбегімен табысқа жеткен адамдар қашанда құрметті, сыйлы болуы керек екенін қадап айтты.

«Бұл біз ұсынып отырған «Адал азамат – Адал еңбек – Адал табыс» қағидатына толық сай келеді. Бір сөзбен айтқанда, біздің қоғамда еңбекқорлық, кәсібилік сияқты қасиеттер өте жоғары бағалануға тиіс. Өз кәсібін жетік меңгерген мамандар ұлт сапасын арттырады. Сондықтан біз еңбек адамының мәртебесін көтеріп жатырмыз. Бұл бағыттағы жұмыс тоқтамайды, жалғаса береді.

Жұмыстың жаманы жоқ, кез келген еңбек – қадірлі. Ең бастысы, әркім жауапкершілікті терең сезініп, өз міндетін сапалы атқаруға тиіс. Сонда ғана еліміз дамудың сара жолына түседі. Халқымызда «Жұмыстың көзін тапқан байлықтың өзін табады» деген сөз бар. Кәсібіне адал әрі жауапкершілікпен қараған адам қашанда лайықты бағасын алады. Бұл түсінікті қоғам санасына сіңіру қажет. Азаматтарға құрметті атақ берудегі түпкі мақсатымыз да – осы. Бұған дейін мұғалімдерге, дәрігерлерге және мәдениет қайраткерлеріне осындай атақтар беріле бастады. Бұл – өте жақсы бастама, оның аясын кеңейту керек», — деді Президент.

Ал, Мемлекет Басшысы Конгресс-холға жиналған жергілікті қауым алдында сөйлеген сөзінде шаһарға жұмыс сапарымен арнайы келгенін, шырайлы Шымкент еліміз үшін өте маңызды қала, тарихы терең қастерлі мекен екенін жеткізді.
«Халқымыз Шымкентті шырайлы шаһар деп атайды. Расында, бұл жердің ауа райы да, адамдары да өте керемет, ерекше деп айтуға болады. Қала тұрғындары өте еңбекқор, таза, іскер азаматтар. Осы жерде отырған әр азаматтың еңбегі мол. Мен баршаңызға шын көңіліммен ризашылығымды білдіремін.

Менің бірер жыл бұрын Шымкент халқымен кездескенім естеріңізде болар. Сол кезде айтқан сөзімді тағы да қайталап өткім келеді: «Береке дегеніміз – экономика, ал ынтымақ дегеніміз – саясат». Шын мәнінде, осы екі құндылық елімізді алға бастайды. Мұны Шымкенттің бүгінгі келбетіне қарап айтуға да болады», — деп айтқан еді.

Шымкент қаласының Өңірлік коммуникациялар қызметі