Қалыпшының маңдай тері – өндірістің жүрегі

Еліміздің экономикасын алға сүйреп, өндірістің алғы шебінде жүрген еңбек адамдары – бүгінгінің нағыз батырлары. Олардың бейнеті мен маңдай тері – қоғамның іргесін берік ететін басты күш.

Сол жандардың бірі – 39 жастағы Жандос Жайлаубайұлы. Ол үш жылдан бері Kaspy Steel компаниясында қалыпшы болып еңбек етеді. Бұл – екінің бірінің қолынан келе бермейтін, үлкен шыдамдылық пен жоғары жауапкершілікті талап ететін мамандық. Қалып жасаушының қолынан өтетін әрбір бөлшек – тиянақ пен төзімнің көрінісі.

Жандос – төрт ұлдың әкесі. Ол перзенттеріне өнегелі тәрбие беруді парыз санап, еңбекқорлықтың нағыз үлгісін көрсетіп келеді. Оның күнделікті жұмысы – балғамен соққандай ауыр, бірақ бір сәт те ескерусіз қалмайтын маңызды іс. Зауыттағы гүріл мен ыстық пештер – Жандос үшін үйреншікті, әрі қадірлі орта. Себебі ол бұл жұмысты тек нәпақа көзі емес, еліне қосқан үлесі деп біледі.

Биыл елімізде «Жұмысшы мамандықтар жылы» деп жариялануы да бекер емес. Қоғамның шынайы дамуы – қарапайым еңбек адамын қадірлеуден басталады. Ал қалыпшы сынды мамандықтар – кез келген өндіріс ордасының жүрегі мен тірегі.

Жандос сынды азаматтар – қолымен емес, жүрегімен жұмыс істейтін жандар. Олар даңқ пен марапатты күтпейді, үнсіз еңбегімен ұлт болашағын сомдап келеді. Осындай адамдар барда еліміздің іргесі берік, келешегі кемел болмақ.

Еске салсақ, Мемлекет басшысы Қасым-Жомарт Тоқаев Қазақстан халқына Жолдауында кәсіби білім беру жүйесін реформалаудың маңыздылығы туралы мәлімдеген еді.
«Мен 2025 жылды Жұмысшы мамандықтары жылы деп жариялаймын. Осы уақыт ішінде техникалық және кәсіби білім беру жүйесін реформалау қажет. Сондай-ақ біз жұмысшы мамандықтарын дәріптеу арқылы қоғамда еңбекқор және нағыз маман болу идеясын насихаттаймыз».

Мемлекет басшысы адал әрі табанды еңбегімен табысқа жеткен адамдар қашанда құрметті, сыйлы болуы керек екенін қадап айтты.

«Бұл біз ұсынып отырған «Адал азамат – Адал еңбек – Адал табыс» қағидатына толық сай келеді. Бір сөзбен айтқанда, біздің қоғамда еңбекқорлық, кәсібилік сияқты қасиеттер өте жоғары бағалануға тиіс. Өз кәсібін жетік меңгерген мамандар ұлт сапасын арттырады. Сондықтан біз еңбек адамының мәртебесін көтеріп жатырмыз. Бұл бағыттағы жұмыс тоқтамайды, жалғаса береді.

Жұмыстың жаманы жоқ, кез келген еңбек – қадірлі. Ең бастысы, әркім жауапкершілікті терең сезініп, өз міндетін сапалы атқаруға тиіс. Сонда ғана еліміз дамудың сара жолына түседі. Халқымызда «Жұмыстың көзін тапқан байлықтың өзін табады» деген сөз бар. Кәсібіне адал әрі жауапкершілікпен қараған адам қашанда лайықты бағасын алады. Бұл түсінікті қоғам санасына сіңіру қажет. Азаматтарға құрметті атақ берудегі түпкі мақсатымыз да – осы. Бұған дейін мұғалімдерге, дәрігерлерге және мәдениет қайраткерлеріне осындай атақтар беріле бастады. Бұл – өте жақсы бастама, оның аясын кеңейту керек», — деді Президент.

Ал, Мемлекет Басшысы Конгресс-холға жиналған жергілікті қауым алдында сөйлеген сөзінде шаһарға жұмыс сапарымен арнайы келгенін, шырайлы Шымкент еліміз үшін өте маңызды қала, тарихы терең қастерлі мекен екенін жеткізді.
«Халқымыз Шымкентті шырайлы шаһар деп атайды. Расында, бұл жердің ауа райы да, адамдары да өте керемет, ерекше деп айтуға болады. Қала тұрғындары өте еңбекқор, таза, іскер азаматтар. Осы жерде отырған әр азаматтың еңбегі мол. Мен баршаңызға шын көңіліммен ризашылығымды білдіремін.

Менің бірер жыл бұрын Шымкент халқымен кездескенім естеріңізде болар. Сол кезде айтқан сөзімді тағы да қайталап өткім келеді: «Береке дегеніміз – экономика, ал ынтымақ дегеніміз – саясат». Шын мәнінде, осы екі құндылық елімізді алға бастайды. Мұны Шымкенттің бүгінгі келбетіне қарап айтуға да болады», — деп айтқан еді.

Шымкент қаласының Өңірлік коммуникациялар қызметі