Xnews — ақпарат агенттігі Әлем және Қазақстанның соңғы жаңалықтары
Бүгінде жасанды тоғандар мен су нысандарында балық өсіру бойынша Түркістан облысы елімізде көш бастаса, соңғы жылдары Жетісай ауданында тауарлы балық шаруашылығымен айналысуға қызығушылық білдірушілердің саны артып келеді. Соның бірі – Атамекен ауылдық округінің тұрғыны Айман Базарова.
Жеке кәсіпкер осы жылдың мамыр айында жеке қаржысы есебінен балықтың дөңмаңдай (толстолоб) мен амур, сазан сынды түрлерінің 30 мың дана шабағын Шардара ауданынан алып келген. Бүгінде аумағы 3 гектар, тереңдігі 2 метрді құрайтын тоғандарда өсіріліп жатқан балықтардың орташа салмағы 6 айда 1 келіге жеткен. Қарашада саудаға шығарылуы жоспарланған балықтарға қазірдің өзінде Алматы, Астана және Шымкент қалаларынан сұраныстар түсіп отыр.
Аудан әкімі Серік Мамытов жеке кәсіпкердің балық шаруашылығымен танысып, қолға алған кәсібін жан-жақты дамытуға мүмкіндігі бар екенін айтты.
–Бүгінгі таңда балық шаруашылығымен айналысатын шаруаларға мемлекет тарапынан қолдау көп. Мәселен, балыққа берілетін жемдер мемлекет есебінен субсидияланса, тауарлы балық өсіруші шаруашылықтарға арналған техника мен жабдық сатып алуға да қомақты қолдаулар көрсетіледі, – деді аудан әкімі.
Мемлекеттік бағдарламалар аясында жасалып жатқан қолдаулардың тиімділігі мен артықшылықтары жайындағы сұрақтарына толық жауап алған кәсіпкер алдағы уақытта балық асырау бассейндерінің аумағын ұлғайтып, мемлекеттен жеңілдетілген несие алуға ниетті екенін жеткізді.
Мемлекет басшысы Қасым-Жомарт Тоқаевтың елімізде балық шаруашылығын дамыту жайлы бастамасы мен Үкіметке жүктеген нақты тапсырмаларының аясында бүгінде ауданда балық өсіруді кәсіп еткендердің саны 10-ға жеткен.
Түркістан облысы әкімінің баспасөз қызметі
