Xnews — ақпарат агенттігі Әлем және Қазақстанның соңғы жаңалықтары
Шымкент қаласында 2025-2026 жылдардағы жылу беру маусымына дайындық жұмыстары жоспарға сай қарқын алуда. Қала әкімдігі тарапынан атқарылып жатқан жұмыстарға апта сайын тұрақты мониторинг жүргізіліп, негізгі нысандардың қысқа әзірлік деңгейі кезең-кезеңімен пысықталуда.
Қаладағы басты энергия көзі — «3-Энергоорталық» АҚ (ЖЭО-3) нысанында биылғы жылыту маусымына дайындыққа 743,5 млн теңге бөлініп, қазірге дейін оның 87,3%-ы игерілді. Сонымен қатар, қаланың 27 бөлек орналасқан жылу қазандығының 23-і және 17 сорғы станциясының 13-і толық дайын күйге келтірілді.
Жалпы ұзындығы 838,6 шақырымды құрайтын қалалық жылу желілерінің 37 пайызы тозған. Қазіргі таңда барлық желілер гидравликалық қысыммен тексеріліп, 98 ақау анықталған. Оның 90-ы жойылып, қалғандары 1 қыркүйекке дейін жөнделетін болады.
Бүгінде 1,5 млрд теңгеге «АДЦ-160 Гкал» қазандығын жаңғырту жұмыстары жүргізілуде. Бұл – жалпы құны 3,1 млрд теңгелік перспективалық жоба. Сонымен қатар, Гоголь көшесі мен Адырбеков көшесі бойындағы магистральдық жылу желілерін қайта құру жобасы (құны – 1,9 млрд теңге) түзету кезеңінде тұр.
Қаладағы 2154 көпқабатты тұрғын үйдің 69%-ы (1480 үй) қысқа дайын. Ал 476 бюджеттік мекеменің 464-і (97,4%) жылу маусымына әзір. Әсіресе білім мен мәдениет саласындағы нысандар 100% дайындық танытып отыр.
Аудандар бөлінісінде:
• Абай ауданы – 78% дайын,
• Әл-Фараби – 62%,
• Еңбекші – 79%,
• Қаратау – 70%,
• Тұран – 72%.
Шымкент қаласының жалпы көмір қажеттілігі – 23,3 мың тонна. Қазіргі таңда оның 55%-ы (12,8 мың тоннасы) қамтамасыз етілген. Бюджеттік мекемелерге қажетті 4,8 мың тонна көмірге толық келісімшарт жасалып, тасымалдау кестесі бойынша жеткізілуде.
Халықтың қажеттілігі 18,5 мың тонна деп бағаланса, бүгінде 8 мың тонна көмір сатып алынған. Шымкентке биыл мамырдан бері 57,6 мың тонна көмір жеткізілген. Қаладағы 6 темір жол тұйығында жұмыс істейтін 7 өңірлік оператордың қоймаларында 41,5 мың тонна көмір қоры бар. Бағалар 21 500–22 250 теңге аралығында тұрақты.
Жылу беру маусымы кезінде туындайтын апаттық жағдайларға жедел әрекет ету үшін «Қуатжылуорталық-3» МКК арнайы кезекшілікпен жұмыс жүргізеді.
Шымкент қаласында жылу маусымына дайындық – тек техникалық тексеру емес, бұл – тұрғындардың қауіпсіздігі мен қолайлы өмір сүруінің кепілі. Билік тарапынан қолға алынған жүйелі жұмыстардың нәтижесінде қыс мезгіліне дайындық кезең-кезеңімен толық қамтылуда.
Толығырақ: https://www.youtube.com/live/wvYz091H3rQ?si=SXDLBLecJtDza21J
Шымкент қаласының Өңірлік коммуникациялар қызметі
