Xnews — ақпарат агенттігі Әлем және Қазақстанның соңғы жаңалықтары
Түркістан облысының әкімі Нұралхан Көшеров «Freedom Holding Corp.» компаниясының негізін қалаушы әрі басшысы Тимур Турловпен кездесті. Кездесуде Түркістан облысында инвестициялық жобаларды жүзеге асыру жолдары талқыланды.
– Тарихи Түркістанға қош келдіңіз. Біздің өңірге қатысты жобаларыңызды қарастырып, идеяларыңызды тыңдауға дайынбыз. Облыста өндіріс орындарын ашуға, жаңа технологияларды енгізуге қолдау көрсетіледі, – деді Нұралхан Көшеров.
Тимур Турлов «Ақылды қала» жобасын жүзеге асыру, интернет сапасын жақсарту, ІТ саласындағы технологияларды енгізу және өзге де бастамалар туралы айтты.
Қос тарап ұсыныстарды талқылап, жобаларды нақтылау жөнінде уағдаласты.
Анықтама. «Freedom Holding Corporation» туралы википедияда былай жазылған:
2008 жылы Тимур Турлов американдық қор нарығына және брокерлік қызметтерге рұқсат беретін Freedom Finance компаниясының негізін қалады.
Турлов американдық бағалы қағаздарды белсенді сату арқылы бөлшек инвесторларды тарту есебінен бизнесті дамытқан.
2011 жылы Тимур Русланұлы Турлов отбасымен Қазақстанға көшіп келіп, екі жылдан кейін «Фридом Финанс» АҚ компаниясын ашты. 2024 жылғы жағдай бойынша бұл компания Қазақстан қор биржасындағы ең белсенді сауда-саттық қатысушысы болды.
2015 жылы Турлов Freedom Holding Corp-тың негізгі акционері болды. Осы брендпен ол Freedom Finance Investment Company, Freedom Finance JSC, Freedom24 және Freedom Finance Bank компанияларын біріктірді. Турлов 73% -ға жуық акциялар пакеті бар холдингтің негізгі акционері болды
2015-2018 жылдары Freedom Holding еншілес компаниялары Украина, Қырғызстан, Өзбекстан, Германия және Кипрде ашылды. 2019 жылы Тимур Турлов акцияларды америкалық Nasdaq технологиялық биржасына орналастыру арқылы холдингті жария етті. Осылайша, Freedom Holding Тәуелсіз Мемлекеттер Достастығының Nasdaq қор нарығында листинг алған алғашқы қаржы ұйымы болды.
2022 жылы Турлов Reuters агенттігіне берген сұхбатында Freedom Holding Corp. Ресей нарығынан кететінін мәлімдеді. Компания сол жылдың қазан айында Ресейден кетті. Сол жылы Турлов Қазақстанда өзінің Freedom экожүйесін іске қосатынын жариялады. Оған қаржы секторының компаниялары (брокерлер мен банк), сондай-ақ сақтандыру және тұтыну сегменттерінің өкілдері кірді.
Турлов Холдингі сондай-ақ Еуроодақ елдерінде және АҚШ-та брокерлік бизнесті белсенді дамытуда. 2024 жылғы жағдай бойынша Freedom Holding Corp. еншілес компаниялары әлемнің жиырма eкi елінде бар. Холдингті капиталдандыру $6 млрд. астам қаржыны құрайды.
