“Енді базар емес, сауда үйі болады”: Әкім базарларды жаңғыртуды қолға алды

Шымкент қаласының әкімі Ғабит Сыздықбеков Тұран ауданындағы «Автонұр» базарын аралап, өзекті мәселелерді назарға алды.

Қазіргі таңда базар аумағында жалпы ауданы 8000 шаршы метр жаңа сауда үйінің құрылысы жүріп жатыр. Жаңғырту жұмыстары аясында кәсіпкерлер осы заманауи нысанға көшіріледі деп жоспарлануда.

Бұдан бөлек, 500 көлікке арналған автотұрақ пен кіреберіс жолдарды кеңейту көзделген. Бұл — базар маңындағы қозғалысты жеңілдетіп, келушілер үшін ыңғайлы жағдай туғызуға бағытталған ауқымды абаттандыру жобасының бір бөлігі.

Қала әкімі жауапты басқармалар мен аудан әкімдігіне барлық жұмыстарды үйлестіре отырып, сапалы әрі мерзімінде атқару жөнінде нақты тапсырма берді.