Түркістан жаңғыру мен даму жолында

Ұлтымыздың ұлық мерекесі – Республика күнімен қатар келген хан ордасы болған Түркістанның «Қала күні» құтты болсын, ағайын! Бұл айтулы күнді түркістандықтар шат-шадыман жақсы көңіл-күймен қарсы алып отырғандығын шаһарымызда өтіп жатқан қуанышты оқиғалар шеруінен көруге болады. Шынымды айтсам, мұндай оқиғалар тасқынын бұрын-соңды көрмеппін. Біріншіден, қаламыздың басшысы ауысып, тізгінді жастық жалынмен, заман үрдісімен басқаратын іскер азаматқа ұстаттық.

Екіншіден, мерекелік іс-шаралардың көркін кіргізетін эстрада жұлдыздарының, дәстүрлі өнер иелерінің ағылып келіп жатқан нөпірі, «VOICE OF TURAN-2024» халықаралық байқауының өтуі, облыстық, қалалық деңгейдегі ұлттық құндылықтарымызды насихаттайтын тәрбиелік мәні зор іс-шаралар керуені өз алдына бір төбе, өндіріс, ауыл шаруашылығы, білім, мәдениет салаларына құйылып жатқан инвестициялар, бой көтерген ғимараттар, салынып жатқан мектептер бейне бір сиқырлы таяқшаның сілтеуімен түннен азанға дейін тұра қалғандай жылдамдықпен салынып, пайдалануға берілуде. Аталмыш мерекелердің алдында мемлекет басшысы Қ.Тоқаевтың киелі қаламызға келіп, халықпен жүздесіп, «Достық» үйінің, «Мұз сарайының» тұсауын кесуі облыс тұрғындарын бір серпілтіп тастаған. Енді, міне, бір мезгілде екі мың оқушы білім алатын «Жайлы мектептің», 600-орындық жалпы білім беретін №35 білім ордасының, «Самғау» оңалту орталығының, тағы да бір «Белсенді ұзақ өмір сүру» орталығының тұсаулары кесіліп, пацдалануға берілді. 24- қазан – кітапханашылар күніне орай қаншама мәдени іс- шаралар өткізіліп, талай құнды кітаптардың тұсаулары шешілді.

Сүйікті оқырмандарымен қауышты. Түркістандықтарға бір көру арман болған небір өнер, әдебиет тарландарымен жүздескен жерлестеріміз рухани, мәдени оқиғалардың ен ортасында жүр. Осыдан алты жыл бұрын қоғамдық көлікке кез келген жерден мініп, кез келген жерден түсе беретін қала тұрғындары аялдамалардың атын атап, түсін түстейтін жағдайға жетті. Туған қаланы жасарып-жайнаған Түркістанға айналдырып, «Таза Қазақстанға» үн қосты. Бір сөзбен айтқанда, түркі әлемінің туристік астанасы – Түркістанның зымырандай зырлап, өркендеп-дамыған келбетіне көз тоймайды.

Тек ерінбей еңбек етіп, ауызбір-шілік пен ынтымақ танытып, тасы өрге домалаған, өсіп- өркендеген қаламыздың тіршілігіне білек сыбана араласып, өз үлесімізді қоса білсек болғаны. Бақыт пен ырыстың, береке мен несібенің кепілі – ынтымағымыз арта берсін! Сан ұлттың туған мекені – қасиетті Түркістан! Ырыздық-несібесі көктен жауған Түркістан! «Қала күні» құтты болсын!

Роза НАРЫМБЕТОВА,
Қазақстанның Құрметті журналисі.