Xnews — ақпарат агенттігі Әлем және Қазақстанның соңғы жаңалықтары
Шымкент соңғы жылдары Қазақстандағы туристік әлеуеті жоғары қалалардың біріне айналып келеді. Қалаға келетін туристер санының тұрақты өсуі бұл бағыттағы өзгерістердің нақты көрсеткіші. Өткен жылдың қорытындысы бойынша Шымкентке 550 мыңнан астам турист келген. Ал биылғы жылдың бірінші тоқсанында шамамен 140 мың турист тіркелді. Бұл өткен жылдың сәйкес кезеңіндегі 94–95 мың көрсеткішпен салыстырғанда айтарлықтай өсім. Яғни, алғашқы үш айдың өзінде қалаға келушілер саны шамамен 50 мың адамға артқан.
Бұл өсімге бірнеше фактор әсер етіп отыр. Соның бірі – халықаралық көлік қатынасының кеңеюі. Жаңа әуе бағыттарының ашылуы шетелдік туристер үшін Шымкентке жетуді жеңілдетіп, қаланың халықаралық туристік кеңістіктегі байланысын күшейтеді. Әсіресе Еуропадан туристік топтардың жиі келе бастауы Қазақстанның оңтүстігіне тарихи және мәдени ерекшеліктеріне қызығушылықтың артқанын көрсетеді.
Шымкенттің тағы бір артықшылығы – туристік бағыттардың әртараптандырылуы. Қалада мәдени-танымдық экскурсиялармен қатар экологиялық және экстремалды маршруттар да дамып келеді. Бұл әртүрлі аудиторияның сұранысын қамтуға мүмкіндік береді. Тарихи-мәдени мұра, табиғи нысандар және заманауи қалалық орта бір туристік өнім аясында үйлесім табуда.
Сонымен қатар цифрлық сервистердің дамуы саяхатшыларға қолайлылықты арттырып отыр. Visit-shymkent.com порталы, QR-кодтар және 2ГИС жүйесіндегі туристік нысандар туралы ақпарат қала бойынша бағдарлауды жеңілдетеді. Ал гастрономиялық және көше тағамдары фестивальдері, drone-show секілді имидждік іс-шаралар Шымкенттің туристік брендингін күшейтуге ықпал етеді.
Осы үрдістер Шымкент қаласы туризм басқармасының ендігі міндеті тек саяхатшылар санын көбейту емес, олардың қалада өткізетін уақытын ұзартып, сапалы туристік қызмет пен жаңа маршруттарды қалыптастыру екенін көрсетеді.
