Xnews — ақпарат агенттігі Әлем және Қазақстанның соңғы жаңалықтары
Қазақстанда бұқаралық және балалар спортын дамытуға, спорт инфрақұрылымын кеңейтуге және кәсіби спорттың әлеуетін арттыруға ерекше көңіл бөлінуде. Жас ұрпақтың спортпен тұрақты айналысуына мүмкіндік беретін жағдайлар жасалып, ел бойынша спорт нысандарының саны артып келеді.
Бүгінде 4 жастан 17 жасқа дейінгі 228 мыңнан астам бала 7 мыңнан астам спорт секциясына тегін қатысады. Сонымен қатар елімізде 526 балалар-жасөспірімдер спорт мектебі мен мамандандырылған спорт мектебі жұмыс істейді. Аталған білім беру ұйымдарында 400 мыңға жуық бала спортпен шұғылданады.
Спортпен айналысуға қажетті инфрақұрылымды дамыту бағытында да жұмыстар жалғасуда. Осы жылдың маусым айындағы мәлімет бойынша, елімізде 26,5 мың спорт ғимараты жұмыс істейді. 2026 жылы 34 спорт нысаны пайдалануға берілді. Оның 21-і ауылдық жерлерде орналасқан. Жыл соңына дейін тағы 87 спорт нысанының құрылысын аяқтау жоспарланып отыр.
Спорт саласы үшін білікті мамандар даярлау мәселесіне де басымдық берілуде. Мемлекет басшысының тапсырмасымен 2026 жылы Қазақ ұлттық спорт университеті ашылды. Мұнда «Жаттықтырушылық қызмет» және «Спорт ғылымдары» білім беру бағдарламалары бойынша мамандар даярланады. Сонымен бірге спорттық медицина және оңалту, спорт журналистикасы, менеджмент, спорт саласындағы жасанды интеллект пен аналитика, киберспорт және басқа да бағыттар бойынша кадрлар даярлау көзделген.
Қазақстандық спортшылардың халықаралық жарыстардағы нәтижелері де ел спортының әлеуетін көрсетіп отыр. Жыл басынан бері отандық спортшылар 11 әлем чемпионаты мен 26 Азия чемпионатына қатысып, жалпы саны 99 алтын, 33 күміс және 20 қола медаль жеңіп алды.
2026 жылы Қазақстанда бірқатар ірі халықаралық спорттық жарыс өтті. Атап айтқанда, семсерлесу, стендтік ату және бочча бойынша Әлем кубоктары ұйымдастырылды. Сондай-ақ дзюдодан Grand Slam және IBSA JUDO GRAND PRIX ASTANA турнирлері өткізілді.
Спортқа жасалған мұндай жағдайлар балалар мен жастардың белсенді өмір салтын қалыптастыруына ғана емес, елдің спорттық әлеуетін арттыруға да мүмкіндік береді. Спорт инфрақұрылымының дамуы, тегін секциялардың қолжетімді болуы және кәсіби мамандар даярлау жүйесінің кеңеюі Қазақстан спортының болашағын нығайта түседі.
