Xnews — ақпарат агенттігі Әлем және Қазақстанның соңғы жаңалықтары
Әлемдік тәжірибе көрсеткендей, табиғи ресурстарға ғана емес, шығармашылық әлеуетке сүйенген экономика тұрақты әрі ұзақ мерзімді өсімге қол жеткізеді. Сондықтан көптеген мемлекеттер креативті индустрияны ұлттық экономиканың басым бағыты ретінде дамытуда. Бұл үрдістен Қазақстан да шет қалып отырған жоқ. Президент бастамалары аясында креативті экономиканы қолдау бойынша нақты қадамдар жүзеге асырылуда. Осындай мүмкіндіктерді тиімді пайдалана алатын қалалардың бірі – Шымкент.
Шымкент – кәсіпкерлік белсенділігі жоғары, халқы тығыз орналасқан әрі жас тұрғындарының үлесі басым мегаполис. Мұндай демографиялық ерекшелік шығармашылық салалардың дамуына қолайлы жағдай қалыптастырады. Қалада дизайнерлер, сәулетшілер, бағдарламашылар, фотографтар, бейнеөндірушілер, қолөнершілер, музыканттар және IT мамандарының саны жыл сайын артып келеді. Бұл өз кезегінде креативті экономиканың табиғи экожүйесін қалыптастыруға мүмкіндік береді.
Креативті индустрия тек өнермен шектелмейді. Оның құрамына графикалық дизайн, кино өндірісі, анимация, жарнама, сән индустриясы, ойын әзірлеу, цифрлық медиа, сәулет, мәдени туризм және ұлттық қолөнер кіреді. Бұл салалардың барлығы қосылған құны жоғары өнім шығарып, экспорттық әлеуетті арттыруға қабілетті.
Шымкентте соңғы жылдары шығармашылық бастамаларды қолдауға бағытталған түрлі жобалар жүзеге асырылып келеді. Қалада коворкинг алаңдары, шығармашылық орталықтар, жастарға арналған білім беру бағдарламалары көбейіп келеді. Сонымен қатар IT бағытындағы стартаптардың саны артып, цифрлық кәсіпкерлікке қызығушылық өсуде. Бұл үрдіс жастардың жаңа технологияларды меңгеруіне және халықаралық нарыққа шығуына мүмкіндік береді.
Осы бағыттағы жұмыстар жүйелі түрде атқарылып келеді. Мысалы, бүгін Шымкент қаласының әкімі Ғабит Сыздықбеков Португалиядағы жетекші технологиялық парктердің бірі – «Taguspark» технопаркінің басшысы Эдуарду Баптишта Коррейамен кездесті. Кездесу барысында цифрландыру, инновациялар, технологиялық кәсіпкерлікті дамыту және озық тәжірибе алмасу бағытындағы ынтымақтастық перспективалары талқыланды.
Кездесу барысында Мемлекет басшысының бастамасымен 2026 жылдың Қазақстанда Цифрландыру және жасанды интеллект жылы болып жарияланғаны атап өтілді. Бұл бастама Шымкент қаласында цифрлық технологияларды кеңінен енгізу және инновациялық экожүйені дамыту бағытындағы жұмыстарға жаңа серпін береді.
Тараптар «Smart City» тұжырымдамасы аясында жүзеге асырылып жатқан жобаларға ерекше назар аударды. Атап айтқанда, интеллектуалды көлік жүйесі, қоғамдық қауіпсіздік, денсаулық сақтау, тұрғын үй-коммуналдық шаруашылық және қалалық басқару салаларындағы цифрлық шешімдер таныстырылды.
Сонымен қатар IT-стартаптарды қолдауға және инновациялық ортаны дамытуға бағытталған Shymkent Hub орталығының қызметі, нақты уақыт режимінде деректерді талдайтын Smart Data Ukimet (SDU) платформасы, сондай-ақ AIQYN және Digital Maps жүйелерінің мүмкіндіктері таныстырылды.
Кездесу барысында қалалық инфрақұрылымды бақылауға, қоғамдық қауіпсіздікті күшейтуге және басқару тиімділігін арттыруға арналған дрон инфрақұрылымын дамыту жобасы да таныстырылды. Тараптар «Taguspark» технопаркінің инновациялық инфрақұрылымды дамыту, стартаптарды қолдау және ғылым, білім мен бизнес арасындағы өзара ықпалдастықты нығайту тәжірибесінің маңызын атап өтті. Мұндай тәжірибе алмасу бірлескен жобаларды іске асыруға және екіжақты серіктестікті жаңа деңгейге көтеруге мүмкіндік береді.
Еске салсақ, креативті индустрияларды дамыту – мемлекет саясатының басым бағыттарының бірі, бұл сала Мемлекет басшысының тікелей бақылауында. «Креативті индустрия экономикамызды өркендетуге тың серпін беретініне сенемін», – деп атап өткен болатын Қасым-Жомарт Тоқаев. 2021 жылдан бастап Президент Қазақстан халқына арнаған Жолдауларында бұл секторды ірілендіріп, экономиканың толыққанды бөлігіне айналдырудың маңыздылығына бірнеше мәрте тоқталған.
Туризм саласы да креативті индустриямен тығыз байланысты. Шымкенттің тарихи орындары, ұлттық мәдениеті, гастрономиясы мен қолөнері жаңа туристік өнімдер жасауға мүмкіндік береді. Фестивальдер, көрмелер, көше өнері және мәдени іс-шаралар қаланың имиджін көтеріп, туристер санын арттыра алады.
Қорытындылай келе, креативті индустрия – тек мәдениетті дамыту құралы ғана емес, экономиканы әртараптандыратын, жастарды жұмыспен қамтитын және қаланың халықаралық беделін арттыратын маңызды сектор. Сондықтан бұл бағытты жүйелі түрде қолдау Шымкенттің ұзақ мерзімді дамуына елеулі үлес қосады.
