Xnews — ақпарат агенттігі Әлем және Қазақстанның соңғы жаңалықтары
7 ақпан – «Шардара армспорт» клубының негізі қаланған күн. Осыған орай Шардара қаласындағы спорт кешенінде қол күресі спортынан Шардара ауданының ашық біріншілігі салтанатты түрде басталды.
Салтанатты шараға аудан спортшылары, ардагерлер, спорт сүйер қауым мен қонақтар қатысты. Жарыстың ашылу рәсімінде аудан әкімі, «Шардара армспорт» спорт клубының негізін қалаушы Арман Қарсыбаев қатысушыларды айтулы күнмен құттықтап, спортшыларға сәттілік тіледі.
Өз сөзінде аудан әкімі армспорттың жастарды төзімділікке, табандылыққа, отансүйгіштікке тәрбиелейтін маңызды спорт түрі екенін атап өтті.
Шара барысында еліміздің көк туын әлемдік және халықаралық ареналарда желбіретіп жүрген «Шардара армспорт» клубының үздік спортшылары ерекше құрметке ие болды. Жыл қорытындысы бойынша бірқатар спортшыларға аудан әкімінің алғыс хаты мен арнайы сыйлықтар табысталды.
Сонымен қатар салтанатты жиында армрестлингтен жасөспірімдер арасында төрт дүркін әлем чемпионы Маманияз Жасурбекке «Шардара армспорт» спортшылары атынан 5 бөлмелі тұрғын үйдің кілті табысталды. Бұл – жас чемпионның ел намысын қорғап, биік белестерді бағындырған еңбегіне көрсетілген зор құрмет.
Айта кетейік, чемпионның анасы – көпбалалы, жалғыз басты ана, сегіз ұл-қыз тәрбиелеп отырған ардақты жан. Бұл қуаныш тек бір отбасының ғана емес, барша Шардара жұртшылығының ортақ қуанышына айналды.
Түркістан облысы әкімінің баспасөз қызметі
