Xnews — ақпарат агенттігі Әлем және Қазақстанның соңғы жаңалықтары
Шымкент қаласында өндірістік әлеуетті арттыру және экономиканы әртараптандыру бағытында жүйелі жұмыстар жүзеге асырылуда. 2025 жылға арналған жоспарларға сәйкес, қала аумағында жалпы саны 5 өндірістік аймақты дамыту көзделіп отыр.
Жоспарланған өндірістік аймақтардың жалпы аумағы 1 585 гектарды құрайды. Бұл аумақтарда 300-ге жуық инвестициялық жобаны іске асыру жоспарланған. Жобалардың жалпы құны 900 млрд теңгеге бағаланып, нәтижесінде 13 мыңға жуық жаңа жұмыс орны ашылады деп күтілуде.
Аталған жоспар аясында қолданыстағы 3 өндірістік аймақты кеңейту қарастырылған. Атап айтқанда, «Ontustik» өндірістік аймағы 100 гектарға, сауда-логистикалық орталығы 136 гектарға, ал «Zhuldyz» өндірістік аймағы 155 гектарға ұлғайтылмақ.
Сонымен қатар, қалада 2 жаңа өндірістік аймақты құру жоспарланып отыр. Оның бірі – «Standart» өндірістік аймағы, жалпы аумағы 118 гектарды қамтыса, екіншісі – «Temir» өндірістік аймағы, аумағы 1 076 гектарды құрайды.
Бұл бастамалар Шымкент қаласының инвестициялық тартымдылығын арттырып, жаңа өндірістерді іске қосуға, кәсіпкерлікті дамытуға және тұрғындарды тұрақты жұмыспен қамтуға мүмкіндік береді. Өндірістік аймақтарды дамыту – қаланың әлеуметтік-экономикалық өсіміне серпін беретін маңызды қадамдардың бірі.
