Xnews — ақпарат агенттігі Әлем және Қазақстанның соңғы жаңалықтары
Бүгін Шымкент қаласының әкімі Ғабит Сыздықбеков поляктың «Selena Group» холдингі өкілдерімен кезекті рет кездесу өткізді. Әкім Компания президенті Славомир Майхровски мырзамен бірге құрғақ құрылыс қоспасын шығаратын зауыттың құрылыс кезеңі, инженерлік жұмыс көлемі және маман даярлау мәселелерін талқылады.
Сондай-ақ, колледж студенттеріне арналған дәрістерді, оның ішінде тәжірибелік сабақ пен шеберлік сыныптарын ұйымдастыруға ерекше назар аударылды. «Бұл жаңа зауыт үшін білікті кадр дайындауға, жергілікті мамандардың кәсіби деңгейін арттыруға және студенттердің халықаралық тәжірибе алуына мүмкіндік береді» деді, қала басшысы.
Айта кететін жайт, инвестиция көлемі шамамен 10 млн АҚШ долларын құрайтын жоба қала үшін елеулі пайда әкелмек. Жаңа өндіріс нарықтағы отандық материалдардың үлесін арттырып, құрылыс саласының дамуын нығайтады. Зауыт жылына 150 мың тоннаға дейін өнім шығаруға қауқарлы болады.
Сонымен бірге, құрылыс кезеңінде шамамен 50 уақытша жұмыс орны ашылса, зауыт іске қосылғаннан кейін 100-ден астам адам тұрақты жұмыспен қамтылады.
Кездесуден соң қала әкімі инвесторларға өнеркәсіпті дамытуға қызығушылық танытқаны үшін алғыс айтып, жоба табысты жүзеге асуы үшін толық қолдау білдіретінін жеткізді.
Selena Group — құрылыс химиясының жаһандық өндірушісі және дистрибьюторы және құрылысқа арналған монтаж көбіктерін шығаратын төрт ірі әлемдік өндірушілердің бірі. 30 жылдан астам уақыт бойы ол 100-ден астам елдегі құрылыс алаңдарында жұмысты тездететін және жеңілдететін инновациялық өнімдерді сәтті жеткізіп келеді. Оның көбіктері, герметиктері, желімдері, гидрооқшаулағыш өнімдері, оқшаулау жүйелері, бекіткіштері және шатырдың толық энергетикалық жүйесі энергияны, суды және уақытты үнемдеуге көмектесіп қана қоймайды, сонымен қатар ғимараттардың энергия тиімділігін айтарлықтай арттырады. Selena Group тұрақты құрылыс үшін белсенді жұмыс істейді. Ол Польшаның ESG қауымдастығының жобаларына қатысады.
