Жауапкершілік жолы – құрмет жолы

Өз ісіне адал, жауапкершілігі жоғары әрі тәжірибелі маман – Тилеубаев Бекжан Жұлдыбекұлы апатты қалпына келтіру жұмыстары учаскесінің білікті дәнекерлеушісі ретінде ұжым арасында зор құрметке ие.

Тилеубаев Бекжан Жұлдыбекұлы 1985 жылдың 15 қыркүйегінде Өзбекстан Республикасы, Сырдария облысы, Сайхунобод ауданы, Гүлістан совхозының 5-бөлімінде дүниеге келген.
2001 жылы Қазақстан Республикасына қоныс аударды.
2006–2011 жылдары Жетісай қаласындағы Сырдария университетінде «Қазақ тілі мен әдебиеті» мамандығы бойынша сырттай білім алды.
2003–2014 жылдар аралығында құрылыс саласында дәнекерлеуші болып еңбек етті.
2014–2022 жылдары Шымкент қаласының Су арнасында дәнекерлеуші қызметін атқарды.
2022 жылдың желтоқсан айынан бастап Шымкент қаласы әкімдігінің шаруашылық жүргізу құқығындағы «Су құбыры және канализация басқармасы» мемлекеттік коммуналдық кәсіпорнында дәнекерлеуші болып жұмыс істеп келеді.

Отбасында – екі ұл мен екі қыз тәрбиелеп отырған үлгілі әке, абыройлы азамат.

Бекжан Жұлдыбекұлы — еңбекқорлығы мен кәсібіне деген адалдығы арқылы ерекшеленетін, өз ісінің нағыз шебері. Оның ұзақ жылғы еңбек жолы – табандылық пен жауапкершіліктің жарқын үлгісі.

Еске салсақ, Мемлекет басшысы Қасым-Жомарт Тоқаев Қазақстан халқына Жолдауында кәсіби білім беру жүйесін реформалаудың маңыздылығы туралы мәлімдеген еді.
«Мен 2025 жылды Жұмысшы мамандықтары жылы деп жариялаймын. Осы уақыт ішінде техникалық және кәсіби білім беру жүйесін реформалау қажет. Сондай-ақ біз жұмысшы мамандықтарын дәріптеу арқылы қоғамда еңбекқор және нағыз маман болу идеясын насихаттаймыз».

Мемлекет басшысы адал әрі табанды еңбегімен табысқа жеткен адамдар қашанда құрметті, сыйлы болуы керек екенін қадап айтты.

«Бұл біз ұсынып отырған «Адал азамат – Адал еңбек – Адал табыс» қағидатына толық сай келеді. Бір сөзбен айтқанда, біздің қоғамда еңбекқорлық, кәсібилік сияқты қасиеттер өте жоғары бағалануға тиіс. Өз кәсібін жетік меңгерген мамандар ұлт сапасын арттырады. Сондықтан біз еңбек адамының мәртебесін көтеріп жатырмыз. Бұл бағыттағы жұмыс тоқтамайды, жалғаса береді.

Жұмыстың жаманы жоқ, кез келген еңбек – қадірлі. Ең бастысы, әркім жауапкершілікті терең сезініп, өз міндетін сапалы атқаруға тиіс. Сонда ғана еліміз дамудың сара жолына түседі. Халқымызда «Жұмыстың көзін тапқан байлықтың өзін табады» деген сөз бар. Кәсібіне адал әрі жауапкершілікпен қараған адам қашанда лайықты бағасын алады. Бұл түсінікті қоғам санасына сіңіру қажет. Азаматтарға құрметті атақ берудегі түпкі мақсатымыз да – осы. Бұған дейін мұғалімдерге, дәрігерлерге және мәдениет қайраткерлеріне осындай атақтар беріле бастады. Бұл – өте жақсы бастама, оның аясын кеңейту керек», — деді Президент.

Ал, Мемлекет Басшысы Конгресс-холға жиналған жергілікті қауым алдында сөйлеген сөзінде шаһарға жұмыс сапарымен арнайы келгенін, шырайлы Шымкент еліміз үшін өте маңызды қала, тарихы терең қастерлі мекен екенін жеткізді.
«Халқымыз Шымкентті шырайлы шаһар деп атайды. Расында, бұл жердің ауа райы да, адамдары да өте керемет, ерекше деп айтуға болады. Қала тұрғындары өте еңбекқор, таза, іскер азаматтар. Осы жерде отырған әр азаматтың еңбегі мол. Мен баршаңызға шын көңіліммен ризашылығымды білдіремін.

Менің бірер жыл бұрын Шымкент халқымен кездескенім естеріңізде болар. Сол кезде айтқан сөзімді тағы да қайталап өткім келеді: «Береке дегеніміз – экономика, ал ынтымақ дегеніміз – саясат». Шын мәнінде, осы екі құндылық елімізді алға бастайды. Мұны Шымкенттің бүгінгі келбетіне қарап айтуға да болады», — деп айтқан еді.

Шымкент қаласының Өңірлік коммуникациялар қызметі