Салықтық әкімшілендіруді цифрландыру – әділдік пен тиімділікке бастайтын қадам

Жаңа Салық кодексінің басты мақсаты – салық әкімшілендіруін оңайлатып, салық төлеуші мен мемлекет арасындағы өзара сенімді күшейту.

ҚҚС бойынша тіркеу шегі 10 000 АЕК болып белгіленді, ал тіркеу үш форматта жүзеге асырылады: ерікті, міндетті және шартты.

Мемлекеттік мекемелер мен арнайы режим қолданушылар тіркеуден босатылады.

Салық есептілігі айтарлықтай қысқарды: бұрынғы 39 нысанның 12-сі алынып тасталып, электрондық форматқа көшірілді. Кәсіпкерлер қызмет түрін өзгертсе, жүйе нысандарды автоматты түрде жаңартады.

Берешек сомасына қарай өндіріп алу кезең-кезеңмен жүзеге асырылады:
20 АЕК-ке дейін – ескерту,
20–45 АЕК – шотты бұғаттау,
45 АЕК-тен жоғары – мүлік есебінен өндіріп алу.

Үш айдан астам қарыз өтелмесе, сот арқылы елден шығуға шектеу қойылуы мүмкін.

Салықтық тексерулердің мерзімі де қысқарды: кешенді тексеру – 30 жұмыс күніне дейін, ал шағын бизнес үшін жалпы шегі – 180 күн.

Құжаттарды электронды түрде ұсыну мүмкіндігі берілді, ал шағын кәсіп иелерінен қағаз құжат талап ету екі ретпен шектелді.

Бұл өзгерістер цифрландыру мен ашықтықты арттырып, бизнеске сенімді әрі әділ салықтық орта қалыптастырады.

Салық әділдігі – жеке табыс пен әлеуметтік төлемдердің тұрақты негізі

Жаңа Салық кодексі азаматтардың табысына салынатын салық жүйесін жеңілдетіп, әділдік қағидатын күшейтті. Енді табыс деңгейіне қарай прогрессивті мөлшерлеме қолданылады:
жылдық табысы 35 млн теңгеге дейінгі азаматтар – 10%, ал бұл сомадан жоғары табысқа – 15% салық төлейді.

Жеке тәжірибемен айналысатын тұлғалар (адвокат, нотариус, медиатор және т.б.) үшін мөлшерлеме – 9%. Бұрынғы дивидендтерге берілетін жеңілдіктер жойылып, енді олар 5% және 15% ставкалармен салық салынады.

Әлеуметтік бағыттағы өзгерістер де ауқымды. Бірінші және екінші топтағы мүгедектігі бар тұлғалар үшін шегерім көлемі 882 АЕК-тен 5000 АЕК-ке дейін ұлғайды. Бұл – әлеуметтік әділеттілікті арттыруға бағытталған маңызды қадам.

Сонымен қатар, оқу, ипотека, емделу және көпбалалы отбасыларға берілетін жеке жеңілдіктер орнына бірыңғай стандартты шегерім енгізілді. Оның шекті көлемі ай сайын 30 АЕК болып бекітілді.

Жаңа жүйе салық төлеуді жеңілдетіп қана қоймай, азаматтардың нақты табысына сай әділ жүктеме орнатуды көздейді. Бұл реформа әлеуметтік теңдік пен орта тапты қолдаудың жаңа тетігіне айналады.

Толығырақ: https://www.youtube.com/live/xTeIYEj6Wvc?si=-dRNg7MbZT3kihYF

Шымкент қаласының Өңірлік коммуникациялар қызметі