Xnews — ақпарат агенттігі Әлем және Қазақстанның соңғы жаңалықтары
2025 жылдың 4 қыркүйегінде Шымкент қаласы Әл-Фараби ауданы Полиция басқармасы Жергілікті полиция қызметі басқармасы бастығының орынбасары, полиция подполковнигі Д.Бекболатұлы және Кәмелетке толмағандар істері жөніндегі инспектор, полиция аға лейтенанты Н.Сейтбек қаладағы Д.И. Менделеев атындағы №15 мектеп-лицейінде оқушылармен кездесу өткізді. «Заң мен Тәртіп» қағидаты бір-бірімен тығыз байланысты және қоғамдағы тұрақтылықты қамтамасыз ету үшін өзара әрекет етеді. Әсіресе, жастардың тәртібін дұрыс қалыптастыру мәселесі өте өзекті. Іс-шараның басты мақсаты – балалардың қауіпсіздігін қамтамасыз ету, олардың құқықтық сауаттылығын арттыру, денсаулығын қорғау, сонымен қатар теріс қылықтар мен құқықбұзушылықтардың алдын алу.
Кездесу барысында оқушыларға Қазақстан Республикасының заңдары мен ережелері түсіндірілді. Полиция қызметкерлері балаларға өз құқықтары мен міндеттері туралы кеңінен айтып берді. Әрбір жасөспірімнің білім алуға, демалуға, еркін ойлауға құқығы бар екені атап өтілді. Сонымен бірге, қоғамда өмір сүретін әрбір адамның белгілі бір міндеттері де бар екені еске салынды: заңды сақтау, үлкендерді құрметтеу, мектеп ішіндегі тәртіп ережелерін орындау.
Әкімшілік және қылмыстық жауапкершілік тақырыбы да назардан тыс қалмады. Полицейлер жасөспірімдер арасында кездесетін ұсақ бұзақылық, рұқсатсыз жүріс-тұрыс, қоғамдық орындарда тәртіп бұзу, сонымен қатар интернеттегі құқыққа қарсы әрекеттер туралы нақты мысалдар келтірді. Мұндай әрекеттердің салдары тек айыппұлмен немесе ескертумен ғана шектелмей, болашақта адамның оқуына, жұмысына, өмірлік жоспарларына әсер етуі мүмкін екендігі түсіндірілді.
Полицейлер балаларға теріс жолға түсудің алғашқы белгілерін танып-білу керектігін айтты. Оларға бейәлеуметтік топтармен араласудың, есірткі немесе ішімдікке әуестенудің, бейтаныс адамдардың ықпалына түсудің қауіптілігі түсіндірілді. Әсіресе, соңғы жылдары жасөспірімдер арасында интернет арқылы таралатын зиянды ағымдар мен қауіпті ойындардың көбейіп бара жатқанына назар аударылды.
Оқушыларға қиындыққа тап болған жағдайда әрқашан ата-анасына, ұстазына немесе полиция қызметкерлеріне жүгіну қажеттігі баса айтылды. Бұл – кез келген мәселені шешудің ең дұрыс жолы екендігіне тоқталды.
Іс-шара барысында оқушыларға жеке қауіпсіздікті сақтау ережелері де түсіндірілді. Олардың қатарында жолда жүру мәдениеті, жаяу жүргінші өткелін пайдалану, бейтаныс адамдармен сөйлеспеу, күдікті заттарға жақындамау секілді кеңестер берілді.
Сонымен қатар, полицейлер спортпен шұғылданудың, дұрыс тамақтанудың және күн тәртібін сақтаудың маңыздылығын атап өтті. Денсаулығы мықты, саналы ұрпақ – елдің болашағы екені айтылды.
Бұл кездесудің негізгі нәтижесі – балалардың құқықтық мәдениетін көтеру. Полиция қызметкерлері құқықтық сауатты болу – қазіргі заман талабы екенін, әрбір оқушы заңды білсе, болашақта өзіне де, қоғамға да пайдасы тиетінін жеткізді.
Оқушылар өздерін қызықтырған сұрақтарын қойып, нақты жауаптар алды. Әсіресе, әлеуметтік желілердегі алаяқтық әрекеттер, интернеттегі қауіпсіздік ережелері, мектеп ішіндегі жанжалдарды шешу жолдарына қатысты тақырыптар қызу талқыланды.
Шымкент қаласындағы №15 мектеп-лицейінде өткен бұл профилактикалық шара – балаларды қылмыстан қорғауға, олардың құқықтық сауаттылығын арттыруға бағытталған маңызды бастамалардың бірі. Мұндай кездесулердің басты артықшылығы – оқушылардың заңды практикалық мысалдар арқылы түсінуінде.
Полиция қызметкерлері алдағы уақытта да оқу орындарында жүйелі түрде түсіндіру жұмыстарын жүргізіп отыратынын айтты. Өйткені құқықтық мәдениеті жоғары ұрпақ тәрбиелеу – тек мектеп пен полицияның ғана емес, бүкіл қоғамның ортақ міндеті.
Дереккөз: international.kz
