Қауіпсіз сапардың кепілі – білікті машинист

Теміржол көлігі ел экономикасының күретамыры, ал осы салада адал еңбек етіп жүрген мамандардың үлесі ерекше. Солардың бірі Даулетбаев Нұржан.

Ол теміржол саласында 16 жыл 11 айдан бері үздіксіз еңбек етіп келеді. Еңбек жолын Түркістан локомотив пайдалану депосында машинист көмекшісі болып бастап, тәжірибе жинақтады. Қазіргі таңда жауапкершілігі жоғары машинист қызметін абыроймен атқарып жүр.

Жылдар бойы жинаған кәсіби білімі мен тәжірибесі Нұржанға локомотив тізгінін сеніп тапсыруға толық мүмкіндік берді. Ол өз ісіне жауапкершілікпен қарап, әрбір сапардың қауіпсіз әрі сапалы өтуін басты міндет санайды.

Теміржол саласында еңбек етіп жүрген Нұржан сынды мамандардың тынымсыз еңбегінің арқасында жолаушылар тасымалы да, жүк жеткізу қызметі де уақытылы әрі жүйелі атқарылып келеді.

Еске салсақ, Мемлекет басшысы Қасым-Жомарт Тоқаев Қазақстан халқына Жолдауында кәсіби білім беру жүйесін реформалаудың маңыздылығы туралы мәлімдеген еді.
«Мен 2025 жылды Жұмысшы мамандықтары жылы деп жариялаймын. Осы уақыт ішінде техникалық және кәсіби білім беру жүйесін реформалау қажет. Сондай-ақ біз жұмысшы мамандықтарын дәріптеу арқылы қоғамда еңбекқор және нағыз маман болу идеясын насихаттаймыз».

Мемлекет басшысы адал әрі табанды еңбегімен табысқа жеткен адамдар қашанда құрметті, сыйлы болуы керек екенін қадап айтты.

«Бұл біз ұсынып отырған «Адал азамат – Адал еңбек – Адал табыс» қағидатына толық сай келеді. Бір сөзбен айтқанда, біздің қоғамда еңбекқорлық, кәсібилік сияқты қасиеттер өте жоғары бағалануға тиіс. Өз кәсібін жетік меңгерген мамандар ұлт сапасын арттырады. Сондықтан біз еңбек адамының мәртебесін көтеріп жатырмыз. Бұл бағыттағы жұмыс тоқтамайды, жалғаса береді.

Жұмыстың жаманы жоқ, кез келген еңбек – қадірлі. Ең бастысы, әркім жауапкершілікті терең сезініп, өз міндетін сапалы атқаруға тиіс. Сонда ғана еліміз дамудың сара жолына түседі. Халқымызда «Жұмыстың көзін тапқан байлықтың өзін табады» деген сөз бар. Кәсібіне адал әрі жауапкершілікпен қараған адам қашанда лайықты бағасын алады. Бұл түсінікті қоғам санасына сіңіру қажет. Азаматтарға құрметті атақ берудегі түпкі мақсатымыз да – осы. Бұған дейін мұғалімдерге, дәрігерлерге және мәдениет қайраткерлеріне осындай атақтар беріле бастады. Бұл – өте жақсы бастама, оның аясын кеңейту керек», — деді Президент.