Xnews — ақпарат агенттігі Әлем және Қазақстанның соңғы жаңалықтары
Қазақстан Республикасының Португалиядағы Елшілігінің қолдауымен Шымкент қаласы әкімдігі мен Португалияның Оэйраш қаласы мэриясы арасында бейнебайланыс форматында ресми кездесу өтті.
Кездесуге Шымкент қаласы әкімінің бірінші орынбасары Қуаныш Асылов, Қазақстан Республикасының Португалия Республикасындағы Төтенше және Өкілетті Елшісі Жан Ғалиев және Оэйраш қаласы мэрінің орынбасары Франсишку Роша Гонсалвеш қатысты.
Кездесу барысында екі қаланың инвестициялық және туристік әлеуеті таныстырылып, ынтымақтастықтың перспективалы секторлары ретінде туризм, жеңіл өнеркәсіп, инновациялық технологиялар және фармацевтика салаларын дамыту мүмкіндіктері талқыланды.
Оэйраш қаласы өз тәжірибесімен – инновациялар, технологиялық парктер мен стартап-инкубаторларымен бөлісуге дайын екенін атап өтті.
Өз кезегінде, Оэйраш қаласы – заманауи технопарктер, ғылыми-зерттеу орталықтары мен халықаралық компаниялардың кеңселері шоғырланған, сондай-ақ туризм, ауыл шаруашылығы және қызмет көрсету салалары қарқынды дамыған Португалияның ірі орталығы болып табылады.
Кездесу қорытындысы бойынша қос тарап делегациялар алмасуды, іскер топтардың қатысуымен әріптестік-бауырластық туралы келісімге қол қоюды және ынтымақтастықтың жол картасын әзірлеуді пысықтауға уағдаласты.
Оэйраш — маңызды экономикалық орталық және Португалия мен Еуропадағы ең жоғары дамыған муниципалитеттердің бірі. Ол елдегі жан басына шаққандағы ЖІӨ ең жоғары, сонымен қатар сатып алу қабілеті бойынша екінші ірі муниципалитет (Лиссабоннан кейін), сонымен қатар елдегі салық жинау бойынша екінші орында. Бұл экономикалық көрсеткіштер резиденттердің білім деңгейін де көрсетеді, өйткені Оэйраш елдегі университеттерде білім алған тұрғындардың ең көп шоғырланған жеріне ие. Сондай-ақ Лиссабон аймағындағы жұмыссыздық деңгейі ең төмен өңір.
