Еңбек адамы: Теміржол саласының тәжірибелі маманы

Кәсібіне адалдық пен жауапкершілік – нағыз еңбек адамына тән қасиет. Осындай талапқа толық сай келетін білікті мамандардың бірі – 2004 жылдан бері еліміздің теміржол саласында табанды еңбек етіп келе жатқан Пернебекова Айгерим.

Пернебекова Айгерим өз еңбек жолын 2004 жылдың қазан айында «Қазақстан Темір Жолы» Ұлттық компаниясы» акционерлік қоғамының құрылымында бастап, 2024 жылдың қыркүйек айына дейін жүк және жолаушылар тасымалына қатысты құжаттарды өңдеу, жөнелту және қабылдау рәсімдерін атқарып келді. Сонымен қатар, тиеу-түсіру құжаттарын дұрыс рәсімдеу мен теміржол тасымалына арналған ақпараттық жүйелерді тиімді пайдалану бағытында да қызмет етті.

Көп жылғы тәжірибенің нәтижесінде ол саладағы нормативтік талаптарды терең меңгеріп, теміржол логистикасының бірқатар күрделі үдерістерін кәсіби деңгейде атқара білді. Жауапкершілігі жоғары, талапқа сай және үнемі нәтижеге жұмыс істейтін маман ретінде ол өз әріптестері мен басшылық тарапынан зор сенімге ие болды.

2024 жылдың қыркүйек айында ол ҚТЖ мекемесінің жүк тасымалдау құжаттарын өңдеу жөніндегі оператор қызметіне ауысып, қазіргі таңда да осы лауазымда еңбек етуде. Жаңа міндеттерге икемділікпен бейімделіп, ақпараттық жүйелерді терең меңгерген ол бүгінде теміржол жүк тасымалы үдерісінің сапалы әрі жүйелі жүзеге асуына өзіндік үлесін қосып келеді.

Маманның ұзақ жылғы еңбегі – тек қана кәсіби табыс емес, сонымен қатар жас мамандарға үлгі боларлық өнеге. Еліміздің көлік-логистика жүйесінің дамуына осындай тәжірибелі және еңбекқор қызметкерлердің қосар үлесі зор.

Еске салсақ, Мемлекет басшысы Қасым-Жомарт Тоқаев Қазақстан халқына Жолдауында кәсіби білім беру жүйесін реформалаудың маңыздылығы туралы мәлімдеген еді.
«Мен 2025 жылды Жұмысшы мамандықтары жылы деп жариялаймын. Осы уақыт ішінде техникалық және кәсіби білім беру жүйесін реформалау қажет. Сондай-ақ біз жұмысшы мамандықтарын дәріптеу арқылы қоғамда еңбекқор және нағыз маман болу идеясын насихаттаймыз».

Мемлекет басшысы адал әрі табанды еңбегімен табысқа жеткен адамдар қашанда құрметті, сыйлы болуы керек екенін қадап айтты.

«Бұл біз ұсынып отырған «Адал азамат – Адал еңбек – Адал табыс» қағидатына толық сай келеді. Бір сөзбен айтқанда, біздің қоғамда еңбекқорлық, кәсібилік сияқты қасиеттер өте жоғары бағалануға тиіс. Өз кәсібін жетік меңгерген мамандар ұлт сапасын арттырады. Сондықтан біз еңбек адамының мәртебесін көтеріп жатырмыз. Бұл бағыттағы жұмыс тоқтамайды, жалғаса береді.

Жұмыстың жаманы жоқ, кез келген еңбек – қадірлі. Ең бастысы, әркім жауапкершілікті терең сезініп, өз міндетін сапалы атқаруға тиіс. Сонда ғана еліміз дамудың сара жолына түседі. Халқымызда «Жұмыстың көзін тапқан байлықтың өзін табады» деген сөз бар. Кәсібіне адал әрі жауапкершілікпен қараған адам қашанда лайықты бағасын алады. Бұл түсінікті қоғам санасына сіңіру қажет. Азаматтарға құрметті атақ берудегі түпкі мақсатымыз да – осы. Бұған дейін мұғалімдерге, дәрігерлерге және мәдениет қайраткерлеріне осындай атақтар беріле бастады. Бұл – өте жақсы бастама, оның аясын кеңейту керек», — деді Президент.

Ал, Мемлекет Басшысы Конгресс-холға жиналған жергілікті қауым алдында сөйлеген сөзінде шаһарға жұмыс сапарымен арнайы келгенін, шырайлы Шымкент еліміз үшін өте маңызды қала, тарихы терең қастерлі мекен екенін жеткізді.
«Халқымыз Шымкентті шырайлы шаһар деп атайды. Расында, бұл жердің ауа райы да, адамдары да өте керемет, ерекше деп айтуға болады. Қала тұрғындары өте еңбекқор, таза, іскер азаматтар. Осы жерде отырған әр азаматтың еңбегі мол. Мен баршаңызға шын көңіліммен ризашылығымды білдіремін.

Менің бірер жыл бұрын Шымкент халқымен кездескенім естеріңізде болар. Сол кезде айтқан сөзімді тағы да қайталап өткім келеді: «Береке дегеніміз – экономика, ал ынтымақ дегеніміз – саясат». Шын мәнінде, осы екі құндылық елімізді алға бастайды. Мұны Шымкенттің бүгінгі келбетіне қарап айтуға да болады», — деп айтқан еді.

Шымкент қаласы ішкі саясат басқармасы