Xnews — ақпарат агенттігі Әлем және Қазақстанның соңғы жаңалықтары
Жасыл белдеудегі ағаштардың өнімділігін арттыру үшін облыс әкімінің қолдауымен бірқатар жоба жүзеге асуда. Солардың бірі – Сауран ауданына қарасты «Тоған» су қоймасын қалпына келтіру құрылысы,-деп хабарлайды Xnews.kz ақпарат агенттігі Түркістан облысы әкімінің баспасөз қызметіне сілтеме жасап.
Жаңа әуежайдан 20 шақырым қашықтықта орналасқан су қоймасының сыйымдылығы 1,3 млн текше метрді құраған. Қайта реконструкциялау арқылы су сыйымдылығын 2,1 мың м³-ге жеткізу көзделуде. Тоғанға тәулігіне 2,4 м³ су жыл бойы Иқан су өзенінен үздіксіз келіп құйылады.
Облыс әкімінің орынбасары Нұрбол Тұрашбеков су қоймасына барып, құрылысын бақылады. Мұндағы жұмыс «Тұран су» мекемесімен бірлесе жүзеге асуда. Су қоймасы толық қуаттылықта іске қосылған жағдайда жиналған су 22 шақырым қашықтық аралығындағы, яғни жаңа әуежай жолының екі жағындағы ағаш көшеттерін вегетациялық кезеңде суғаруға толық мүмкіндік береді.
Нұрбол Тұрашбеков көктемгі суғару науқанына тоған толық дайын болуы қажеттігін ескертті:
– Жұмыс барысында жобаға қатысты қайта қарауды қажет ететін мәселелер туындаса, шұғыл хабарлауды тапсырамын. Ертеңге немесе елеусіз қалдыратын кезең емес. Жоспар өз нәтижесін беруі үшін бүгінгі тірлік тиянақты болсын, – деді облыс әкімінің орынбасары.
Бүгінгі таңда жасыл белдеудегі ағаш көшеттерін сумен нормаға сәйкес қамтамасыз ету үшін 2019-2020 жылдары қазылған ұңғымалар электрогенератор арқылы тәулігіне 8 сағат жұмыс атқарады.
Мамандардың мәлімдеуінше, ағаш саны артып, жасыл белдеу аумағы кеңейген жағдайда ескі әуежай учаскесіне, «Қосқорған» су қоймасынан келген су арналарына және Қарашық өзенінің бойына орнатылған мотопомпалардың орнына электр насостар орнату арқылы су тапшылығының алдын алуға мүмкіндік бар.
Көтерілген мәселені мамандармен заң аясында зерделеу, қорытындысымен ұсыныс әзірлеу келісілді.
