Xnews — ақпарат агенттігі Әлем және Қазақстанның соңғы жаңалықтары
Түркістан қаласындағы «ÓzgeEpic» креатив хабында ауыл мектептерінің тыныс-тіршілігін айшықтаған «Ауыл мектебі» фотокөрмесі өтті. Іс-шара шалғай ауылдағы білім ордаларының күнделікті өмірі мен даму жолын көпшілікке таныстыруға арналды,-деп хабарлайды Xnews.kz ақпарат агенттігі Түркістан қаласы әкімінің баспасөз қызметіне сілтеме жасап.
Көрменің басты мақсаты – ауыл мектептеріндегі жаңа технологияларды енгізу, білім сапасын арттыру жолындағы ізденістерді көрсету, сондай-ақ ауыл тұрғындарының тұрмысы мен болмысын ашып көрсету. Фотокөрме бұған дейін елордада таныстырылып, енді Түркістан жұртшылығының назарына ұсынылды.
Іс-шара «ÓzgeEpic» креатив хабының бастамасымен және Білім беру саласын тұрақты дамыту қорының қолдауымен ұйымдастырылды. Қор елімізде білім беру сапасын теңестіру бағытындағы бірқатар маңызды жобаларды жүзеге асырып келеді.
Көрменің авторлары – белгілі фотосуретшілер Әйгерім Бегімбет пен Сәбина Әбдімәлік. Әйгерім Бегімбет – журналист әрі фотосуретші, «100 жаңа есім» жобасының жеңімпазы және “Үркер” ұлттық сыйлығының лауреаты. Сәбина Әбдімәлік – суретші-фотограф, оның фотожұмыстары еліміздің бірнеше қалаларында қойылған.
Фотокөрме барысында қатысушылар авторлардың шығармашылық идеяларымен танысып, фотосуреттер кейіпкерлерінің оқиғаларын тыңдауға мүмкіндік алды.
«Ауыл мектебі» фотокөрмесі – шалғайдағы білім беру мекемелерінің әлеуетін паш етіп, ауыл мектептері мен оқушыларының дамуына жаңа серпін беруге бағытталған бірегей жоба.
