Түркістандықтар Республика күнін қалай тойлады?

Биыл 25 қазанда Республика күні елімізде ұлттық мереке ретінде үшінші рет аталып өтеді. 2022 жылы Президент Қасым-Жомарт Тоқаев Республика күніне ұлттық мереке мәртебесін қайтаруды ұсынған болатын.

Онда «ҚР кейбір заңнамалық актілеріне кинематография мәдениет және мерекелер мәселелері бойынша өзгерістер мен толықтырулар енгізу туралы» заңына қол қойған еді. Аталған заңға сәйкес 25 қазан ұлттық мереке – Республика күні, ал 16 желтоқсан мемлекеттік мереке – Тәуелсіздік күні болып белгіленген. Осыған орай, біз мереке қарсаңызда, «Республика күні» туралы тың деректерді ұсынып, түркістандықтар бұл мерекені қалай атап өткенін тарқатып жазатын боламыз.

Мысалы Республика күні қарсаңында Түркістанда ауқымды мерекелік іс-шаралар өтті. Президент Қасым-Жомарт Тоқаевтың Ақордадағы Мемлекеттік ту көтеру рәсімінің жалғасы Түркістан қаласындағы Рәміздер алаңында болды. 24 қазан күні елдің және өңірдің дамуына елеулі үлес қосқан азаматтарды марапаттау мақсатында облыстық салтанатты іс-шара ұйымдастырылды. Мұнда түрлі сала қызметкерлері, еңбек ардагерлері мен ерлік көрсеткен азаматтар мемлекеттік наградалар, алғыс хаттар мен грамоталармен марапатталды. Мерекенің бүкілхалықтық атмосферасын қалыптастыру үшін жаппай халықтық серуендер, мерекелік сауда мен концерттер ұйымдастырылды. Білім және мәдениет ұйымдарында тақырыптық көрмелер, дәрістер мен сынып сағаттары, спорттық фестивальдер өтті. Мереке қарсаңында өңірде жаңа 10 әлеуметтік нысан пайдалануға беріледі, олардың қатарында мектептер, спорт кешендері мен дәрігерлік амбулаториялар бар. Сонымен қатар, 24 қазанда Келес ауданындағы Жиделі ауылында 75 орындық клуб ашылды. «Таза Қазақстан» шарасы аясында жаппай экологиялық іс-шаралар өткізіліп, көшелер мен саябақтар тазартылып, ағаштар отырғызылды.

Сондай-ақ, Түркістанда 25 қазан – Республика күніне орай ауқымды мәдени іс-шаралар өтті. Мысалы Түркістан облыстық мәдениет басқармасы осы мереке қарсаңында бірқатар іс-шараларды жоспарлаған. Олардың ішіндегі ең ауқымдысы – «Voice of Turan» халықаралық қазақ әндер фестивалі. 22 қазанда бастау алған бұл байқау бүгінде «Конгресс Холл» көпсалалы кешенінде өтті. Биыл бесінші рет өткізіліп отырған бұл шарада Қырғызстан, Өзбекстан, Татарстан, Башқұртстан, Түркия, Куба, Грузия, Әзербайжан сынды елдерден келген жас әншілер қазақ әндерін орындалды. Сонымен қатар, 23 қазан күні Қазығұрт ауданында жазушы, драматург, қоғам қайраткері Қалаубек Тұрсынқұловтың 90 жылдығына арналған «Қазығұрт – береке, бірлік бастауы» атты республикалық ақындар айтысы өтті. Бұл айтыс қазақ халқының дәстүрлі өнеріне деген қызығушылықты арттыру мақсатында ұйымдастырылып отыр. Ал 24 қазанда Түркістан қаласының «Конгресс Холл» кешенінде Республика күніне арналған салтанатты іс-шара өтті. «Жаса, жайна, Қазақстан» атты мерекелік жиынға облыс басшылары, қоғам қайраткерлері мен еңбек ардагерлері қатысып, ел дамуына үлес қосқан азаматтарды марапаттады. Сонымен қатар, бүгін Рәміздер алаңында Мемлекеттік ту көтеру рәсімі болды. Бұл рәсім Республика күнінің рухын асқақтатып, оның маңыздылығын арттыра түседі. Мәдениет саласынан бөлек, облыстың басқа да ұйымдары Республика күніне белсене атсалысты. 23 қазанда «Ұлттық ұлан» әскери кешенінде «Фараб» әмбебап кітапханасы ұйымдастырған «Қыран елім – Қазақстан» атты мерекелік кеш өтті. Бұл шара жастардың отансүйгіштік қасиеттерін арттырып, елге қызмет етудің маңыздылығын насихаттады. Түркістанда өткен бұл іс-шаралар Республика күнінің тарихи мәнін айқындап, елдің дамуына әрбір азаматтың қосқан үлесінің маңызды екенін көрсетті. Мерекелік шаралар тұрғындарға патриоттық рух сыйлап, елдің болашағына деген сенімді нығайтты.

Ал Республика күнінің қайта оралуына көз жүгіртетін болсақ, тарихи жылнама мен ел есіндегі маңызды қадам алғышарты екенін бағамдай аламыз. Нақтырақ айтсақ, 1990 жылдары Кеңес Одағының саяси және экономикалық жүйесі құлдырап, одақтық республикалар егемендікке ұмтылыс жасай бастады. Осы кезеңде Қазақстан да өз мемлекеттілігін және дербестігін жариялау қажеттілігін сезінді. 1990 жылғы 25 қазанда Қазақ КСР Жоғарғы Кеңесі «Қазақстанның мемлекеттік егемендігі туралы декларацияны» қабылдады. Бұл құжат Қазақ КСР-нің ішкі және сыртқы саясатының дербестігін, заңнамалық, экономикалық және мәдени дамудың тәуелсіздігін айқындады. Бұл құжаттың маңызы зор болды, себебі ол тәуелсіздікке бағытталған Қазақстанның алғашқы ресми қадамы болып табылды. Тәуелсіз Қазақстанның тарихында 25 қазан Республика күні ретінде 2001 жылға дейін ресми түрде аталып өтті. Алайда, 2001 жылдан бастап бұл мереке мемлекеттік күнтізбеден алынып, оның орнына 16 желтоқсан – Тәуелсіздік күні басты ұлттық мереке ретінде бекітілді. Дегенмен, 2022 жылы Қазақстанның Президенті Қасым-Жомарт Тоқаевтың бастамасымен 25 қазан қайтадан ұлттық мереке мәртебесіне ие болды. Бұл шешім тарихи негіздерге сүйене отырып, елдің егемендікке деген ұмтылысын еске салу, халықтың тәуелсіздік жолындағы күресін ұлықтау мақсатында қабылданды.

Бүгінгі таңда 25 қазан – ұлттық бірлік пен мемлекеттіліктің символы ретінде атап өтіледі. Бұл мереке елдің тәуелсіздікке қол жеткізу жолындағы маңызды кезеңдерін еске салып, болашаққа сеніммен қарауға мүмкіндік береді. Қазақстан халқы осы күнді атап өту арқылы өз тарихын ұлықтап, тәуелсіздікке қол жеткізген күндерді еске алады. Бұл мереке еліміз үшін тарихи сананың қалыптасуына, мемлекеттің дамуына қосқан үлесін бағалауға, сондай-ақ болашақ ұрпаққа тәуелсіздік пен егемендіктің құндылықтарын жеткізуге бағытталған. Республика күні – қазақ халқының еркіндікке деген ұмтылысының жарқын көрінісі және әрбір азаматтың жүрегінде патриоттық сезімді нығайтатын маңызды мереке.

Дереккөз: yassy-tur.kz