Түркістандық жас патриоттар жеңіспен оралды

Еліміздің Оқу-ағарту министрлігінің ұйымдастыруымен өткен қазақстандық «Жас патриоттар академиясының» кезекті республикалық форумына қатысқан түркістандық жас патриоттар жеңіспен оралды.

Жас патриоттарды олардың ата-аналары мен сыныптастары, мектеп мұғалімдері, қалалық білім бөлімі мен қалалық ішкі саясат бөлімінің «Жастар ресурстық орталығының» қызметкерлері қарсы алды. Биылғы жиын Алматы облысындағы «Балдәурен» республикалық оқу-сауықтыру орталығында өтті. Аталған іс-шараға еліміздің түкпір-түкпірінен 400-ге жуық жас патриот қатысты. Патриоттық тәрбие беруді көздейтін форумда облыс намысын биік қойған бір топ оқушы жас патриоттардың республикалық форумына қатысып, үздік нәтижеге қол жеткізді. Жалпы форумның мақсаты – Қазақстанның жас патриоттарын тәрбиелеу және Отан алдындағы қорғаудағы азаматтық борышы мен міндеттерін орындауға дайындығын қалыптастыру.

Аталмыш форумда үздік нәтиже көрсеткендердің бірі қаламыздағы Абай атындағы №31 жалпы орта метептің 9 сынып оқушысы – Диас Сүлейменов. Диасты қарсы алуға сыныптас достары мен мектеп мұғалімдері келді. Ол түрлі білім аламандарында топ жарып жүрген озат оқушы. Форумда өзінің алғырлығымен көзге түсіп, «Жас патриот» төсбелгісіне және арнайы алғыс хатқа ие болды.

– Біз бұл жетістікке «Жас патриоттар академиясының» кезекті республикалық форумына қатысып, түрлі тапсырмаларды орындап, жоғары нәтиже көрсету арқылы жеттік. Қандай қиын сын болса да мойымастан бәрінен өтіп, көзге түсіп, үздік атандық. 7 жыл бұрын небәрі 8 жасымда форумның негізін қалаушы Ділдәш Рысқұлбекқызының қолынан 4 күміс, 1 алтын жүлде иеленгенмін. Өзіммен қатар замандастарымның бойында патриоттық қасиетті дамыту үшін осындай форумдардың көп болып тұруы өте қатты әсер етеді деп ойлаймын, – дейді Диас Сүлейменов.

Форум аясында өз қатарластары арасында ерлігімен көзге түскен 50 оқушыға аталған қоғамдық бірлестіктің куәлігі мен төсбелгісі табыс етілді. Онда негізінен «Патриотизм – біртұтас тәрбие бағдарламасының негізгі арқауы» тақырыбы жан-жақты талқыланды. Форумда қоршаған ортаны қорғау, буллингке қарсы іс-әрекет, азаматтық борыш, педагогикалық кәсіп және т. б. мәселелер қозғалды. Форумға қатысушылар үшін жас патриоттардың жетістіктерінен көрме ұйымдастырылды. Ерлік жасаған оқушылар қазақстандық Жас патриоттар академиясының қатарына салтанатты түрде қабылданды.

Айта кетейік, қазақстандық «Жас патриоттар академиясы» мүшелерінің саны бүгінде 3500-ге жеткен. Форумға облыстық білім басқармаларының, жоғары әскери оқу орындарының, колледждердің, «Жас ұлан» республикалық мектептерінің басшылары, қазақстандық Жас патриоттар академиясының мүшелері, мұғалімдер, ата-аналар мен батыл әрекет жасаған оқушылар қатысады.