Xnews — ақпарат агенттігі Әлем және Қазақстанның соңғы жаңалықтары
Сібір жарасы — мал және жабайы жануарлардың жіті түрде өтетін аса қауіпті жұқпалы ортақ ауруы. Осы аурудан өлген жануарларды сойып, ішін жаруға болмайды. Себебі өлген немесе сойылған ауыл шаруашылығы жануарларының терісі, еті, жүні т.б. арқылы індеттің ауру қоздырғышы сыртқы ортаға таралады,-деп хабарлайды Xnews.kz ақпарат агенттігі Шымкент қаласы ішкі саясат басқармасына сілтеме жасап.
Жануарлардағы сібір жарасы келесі ерекшеліктермен сипатталады: дене қызуының көтерілуі, қан қысымының төмендеуі, қанды іш өту және құсу. Жануар құлайды, ауыз қуысынан, мұрыннан, анустан қан бөлінеді. Жануардың терісінде жара, ісіну болуы мүмкін. Өлген жануардың қаны қара май түсті болады, ұйымайды.
Айта кету керек, ауыл шаруашылығы жануарларына сібір жарасы ауруына қарсы вакцина мемлекет тарапынан тегін салынады. Вакцина егілген малдарды иммундаудан кейін екі апта өткен соң союға болады.
Тағы бір жайт, биылғы жылдың басынан көршілес облыстарда Сібір жарасы ауруының тіркелді. Осыған байланысты тұрғындардан қатаң түрде сақтық шараларын ұстауды сұраймыз. Өзіңіздің денсаулығыңызды қауіп-қатерден сақтау үшін тағамға қолданылатын мал өнімдерін, оларды өңдеуден өткізу тек қана ветеринариялық сараптамадан кейін ғана қолданғаныңыз жөн!
ЕСКЕРТУ: Адамдарда аурудың алғашқы белгілері пайда болғанда (тері жамылғысын зақымдайды, диаметрі 1-2 см, қызыл-көкшіл түсті ауырмайтын дақ пайда болады. Сол жер қышиды,ашиды) міндетті түрде тез арада медициналық көмекке жүгініңіз, себебі ем неғұрлым ерте басталса, нәтижесі де қолайлы болады.
Аталған белгілерді байқаған жағдайда шұғыл түрде Шымкент қаласының «Ветеринариялық қызмет» МКК-на хабарласуыңызды сұраймыз.
Байланыс нөмерлері: 8 (72-52) 45-05-05,45-05-22;
Ал қосымша ақпарат алу үшін Шымкент қаласының ауыл шаруашылығы және ветеринария басқармасына, 8 (72-52) 24-75-37 байланыс нөмеріне хабарласуыңызға болады.
