Ахмет Ясауи мен Назарбаев университеттерінің ортақ жобасы Түркістанда жалғасын тапты

Жуырда Қожа Ахмет Ясауи атындағы Халықаралық қазақ-түрік университетінде Назарбаев университетінің Жоғары білім беру мектебінің бастамасымен, оқу ордамыз мен ҚР Ғылым және жоғары білім министрлігі бірлесе ұйымдастырған «Academic Leadership Institute: Deans’ School» атты декандардың кәсіби дамуына арналған жаңа бағдарлама жалғасын тапты.

Үстіміздегі жылдың 25-29 қыркүйегі аралығында Астана қаласында Қазақстан Республикасы Ғылым және жоғары білім министрлігінің ұйымдастыруымен «Академиялық көшбасшылық институты: декандар мектебі» курсы басталған еді.Осы шараның жалғасы ретінде Ахмет университетінің базасында: «Білім беруді цифрландыру», «Студенттердің жетістіктері» және «Таланттарды басқару» модульдері өткізілді.

Бұл іс-шара университет декандарының біліктілігін арттыруға және олардың академиялық саладағы көшбасшылық құзыреттерін нығайтуға бағытталған. Ясауи университетінде 3 күнге созылған жиын барысында Назарбаев университеті оқу бағдарламаларын әзірлеудегі тәжірибесімен, сондай-ақ магистратура мен докторантура бағдарламаларын жобалаудың артықшылықтарымен бөлісті. Курс академиялық менеджмент пен инновацияны, озық тәсілдер мен технологияларды, соның ішінде жасанды интеллектті пайдалану және тұрақты өзгеретін ортада этикалық тәжірибенің жоғары стандарттарын сақтау мәселелерін талқылады.Пленарлық мәжілісте ғалымдар құнды баяндамаларын оқып, тәжірибелерімен бөлісті. Еліміздің әр түкпірінен Түркістанға келген декандар 10-12 қазан аралығында «Білім беруді цифрландыру», «Студенттердің жетістіктері» және «Таланттарды басқару» модульдері бойынша біліктілік арттырды.

Бағдарламаның мақсаты – қазақстандық жоғары оқу орындары көшбасшыларының кадрлық резервін дайындау. Тыңдаушыларда тұрақты өзгерістер жағдайында факультеттерді тиімді басқаруға, инновациялық тәсілдер мен технологияларды табысты біріктіруге, сондай-ақ этикалық практиканың жоғары стандарттарын қолдауға мүмкіндік беретін құзыреттерді дамыту да көзделді.

Декандар мектебі аясында оқу орнымызға келген қонақтарды «Атамекен» ұлт-аспаптар ансамблі сазды әуен қарсы алып, керемет көңіл-күй сыйлады. Сондай-ақ, Қазақстан мен Қырғызстаннан келген бағдарлама қатысушылары «Түрік әлемінің тарихи панорамалық» мұражайын аралады. Оқу орнымыздың Студенттік театры “Ясауи жолы” тарихи-драмалық қойылымын сахналады. Көрермендер болашақ актер студенттеріміздің өнері мен қабілетіне тәнті болды.

Сондай-ақ, ХҚТУ Ботаникалық бағының өндірістік цехте дайындалған өнімдері таныстырылды.

Жиынның ашылу рәсімінде арнайы сөз алған университет ректоры Жанар Темірбекова: «Құрметті қонақтар, қасиетті Түркістан шаһарына қош келдіңіздер! Аз уақыт бұрын, өздеріңізбен бірге Назарбаев университетінде декандар мектебінің ашылу салтанатын өткіздік. Ал бүгін Түркістанда, университетіміздің кампусында бағдарламаның 3-модулін бастаймыз.Бүгінгі жиынға 34 жоғары оқу орынынан 80-нен аса декан қатысуда. Әр декан – ұжымды басқарып қана қоймай, студенттер және олардың ата-аналарымен байланыста болатын, 1000-нан аса адамға ықпал ететін тұлға. Сондықтан декандарға бағытталған бұл бағдарлама үлкен маңызға ие. Декандар мектебіне серіктестік жасау ұсынысы түскенде қуана қабыл алдық. Осы тұста, Назарбаев университетіне алғысымызды білдіреміз!

Қазақстандық жоғары оқу орындарына өзара бәсекеден гөрі, ынтымақтастық қарым-қатынас орнату көбірек жарасады. Әр оқу орданың өзіне тән ерекшелігі мен артықшылықтары бар. Ең бастысы, осы ортада бір-біріңізбен тәжірибе алмасып, атқарған жұмыстар мен алда жүзеге асыратын істер туралы пікір алмасу жүреді деп сенеміз!»,-деді.

Құттықтау сөз кезегін алған ректор өкілі м.а Наджи Генч: «Құрметті қонақтар, әріптестер, сіздерді оқу ордамыздың төрінде көргенімізге қуаныштымыз! Бағдарлама аясында бірлесе жұмыстар атқарып, пайдасы мол әрі маңызға ие жобалар жүзеге асады деп сенеміз!»,-деді.

Ал «Назарбаев Университеті» ДББҰ жоғары білім беру мектебінің қосымша білім беру департаментінің директоры Жаңыл Жонтаева бағдарлама қатысушыларын құшақ жая қарсы алып, қонақжайлықтың үлгісін көрсеткен ректор Жанар Темірбекова мен оқу орда ұжымына алғыс білдірді.

Айта кетейік, оқу ордамызға Қазақстанның педагогикалық, техникалық, ұлттық, медициналық және жекеменшік жоғары оқу орындарынан, сондай-ақ Қырғызстан университеттерінен іріктелген 80-нен аса қатысушы келді.

Кәсіби шеберлікті дамытуға бағытталған ауқымды жоба үлкен қызығушылық тудырды – Қазақстанның педагогикалық, техникалық, ұлттық, медициналық және жекеменшік жоғары оқу орындарынан, сондай-ақ Қырғызстан университеттерінен 170-тен астам өтінім түсті. Іріктеу процесі барысында аналитикалық эсселерді бағалау және бейне сұхбаттар нәтижесінде 80 қатысушы таңдалды. Олардың қатарында Ахмет Ясауи университетінің іріктеуден өтіп, бағдарламаға қатысуға мүмкіндік 7 ғалымын айтсақ болады.
1. Исаев Ғани Исаұлы
2. Нұсқабаева Гүлназ Оразбекқызы
3. Масадиков Хайрулла Ғайбуллаұлы
4. Бостанова Ардақ Мұратқызы
5. Саржанов Фахриддин Нұрмахамедұлы
6. Ағабекова Ақтолқын Бекарысқызы
7. Омарова Балнұр Әділбекқызы

Ұйымдастырушылардың сөзіне қарағанда, бағдарлама әзірлеу барысында жан-жақты талдаулар негізге алдынған. Еліміздегі бірқатар жоғары оқу орын­да­рындағы декандардың ла­уа­зым­дық сипаттамасы мұқият баға­лан­ды. Сондай-ақ «Kozybayev University», «Narxoz», «Kimep» және Қожа Ахмет Ясауи атындағы ха­лық­аралық қазақ-түрік уни­вер­­ситеті секілді оқу орын­да­ры­ның академиялық көш­бас­шы­ларымен фокус-топтық тал­­­қылау жүргізілді. Бұл талдаулар бағдарламаны қазіргі декандардың алдында тұрған негізгі мәселелерді шешуге бағыттауға мүмкіндік бермек. Жоғары оқу орын­дарын­дағы декандар мен кафедра мең­геру­шілері студенттермен тығыз байланыста жұмыс істеп, олардың ғылы­ми дамуына жағдай жасай­ды. Сондықтан жоғары білім­нің сапасын арттыруға декан мен деканатқа баса назар ауда­ру керек.

Еліміздегі іргелі екі жоғары оқу орнының ортақ жобасы Қазақстан мен Қырғызстанның жоғары оқу орындарынан келген 80-нен астам проректор, декан, департамент директорлары мен ғалымдардың басын қосты.
Қатысушылар университет базасында «Білім беруді цифрландыру», «Студенттердің жетістіктері», «Таланттарды басқару» модульдері бойынша біліктілік арттырып қана қоймай, рухани байланысты да нығайтты.

2024 жылдың қыркүйек-желтоқсан айлары аралығында өтетін оқыту жобасы орта деңгейдегі академиялық көшбасшылардың қуатты тобын қалыптастыруға бағытталған. Бағдарлама университеттік факультеттер мен департаменттерді басқарудың стратегиялық және практикалық аспектілерін қамтитын негізгі салалар бойынша модульдерді ұсынады. Тыңдаушылар білім сапасын басқару, цифрлық трансформация, жасанды интеллект, оқу бағдарламаларын әзірлеу, стратегиялық жоспарлау, таланттарды басқару және корпоративтік мәдениет сияқты негізгі бағыттарда білім алады. «Deans’ School» ұлттық және халықаралық сарапшылардың қатысуымен аралас форматта өткізіледі, бұл бай әрі жан-жақты оқыту тәжірибесін ұсынады.

Бағдарлама негізінен 9 модульден тұрады:
1. Білім беру сапасын басқару;
2. Білім берудегі академиялық қызмет және инновация;
3. Білім беруді цифрландыру;
4. Білім берудегі стратегиялық жоспарлау және басқару;
5. Өзгерістер жағдайында көшбасшылық және басқару;
6. Студенттердің жетістіктері;
7. Таланттарды басқару;
8. Зерттеулерді басқару;
9. Институционалдық мәдениет және этика.

Қорыта айтқанда, «Декан­дар мектебі» бағдарламасы елі­міз­дегі жо­ғары білім беру саласына ай­тар­лықтай өзгеріс әкелмек.