Шымкентте жүрек — қан тамыр жүйесі ауруларынан өлім-жітім азайды (видео)

Шымкентте жүрек-қан тамыр жүйесі ауруларынан болатын өлім-жітім 22 пайызға азайды,-деп хабарлайды «24kz» телеарнасы.

Дәрігерлер оң өзгерісті ишемиялық және өткір коронарлық синдром ауруларына жасалатын озық операциялармен байланыстырады. Сонымен қатар скиринингтік тексерулер ауруды ерте анықтап, дұрыс ем қолдануға мүмкіндік беріп отыр.

52 жастағы Ғабит Әбіләкімнің кеуде тұсындағы ауырсынуы артта қалды. 3 ай бұрын орталыққа шұғыл жеткізіліп, жүрек-қан тамырларына операция жасатқан. Бұл жолы тарылған қан жүйесін тарқату үшін тағы екі стенд орнатылды. Дәрігерлер операцияны иненің жасуындай ғана тесікпен жасағандықтан аз күнде толық оңалып келеді.

Ғабит Әбіләкім, қала тұрғыны:
— Жедел-жәрдеммен келіп осы жердегі дәрігерлер өздерінің жұмыстарын істеп, анализін алып, арасында 20-30 минут болған жоқ бірден реанимацияға апарып, түнгі 12-лерде жасап шығарды. Содан кейін тәуірмін. Ауырғанының бәрі кетіп, берген дәрілерін іштік. 2-3 айдың көлемінде тағы 2 стент қойып шығып отырмын.

Былтыр орталықта 6 мыңға жуық операция жасалды. Оның үштен біріне коронаграфиялық зерттеулерден соң жүрек-қан тамырларына стенд орнатылды. Сонымен қатар дәрігерлер құрамы жүрек қақпақшаларын ауыстырып, туа біткен немесе жүре пайда болатын ауытқуларға операциялардың озық әдістерін қолданған.

Исабек Керімқұлов, қалалық жүрек орталығы ангиографиялық зертханасының бөлім меңгерушісі:
— Бұл жерде жасалатын отаның 90 % жергілікті жансыздандыру арқылы жалпы нархоз берілмейді. Науқас толық есін біліп жатады. Дәрігермен толық қарым-қатынаста және интервенциялық оталардан кейін жазылу, оңалуы біршама тез болады.

Биыл жүрек-қан тамырлары ауруларынан болатын өлім-жітім 22% азайды. Дәрігерлердің айтуынша оған ауру сатысын ерте анықтап, жоғары технологиялық операцияларды дер кезінде жасаудың септігі тиген. Скринингтік тексерулер мен операциялар әлеуметтік медициналық сақтандыру қоры арқылы тегін жасалады.

Арапкүл Ізбасарова, «Әлеуметтік медициналық сақтандыру қоры» КЕАҚ филиал директорының орынбасары:
— Қазір заманауи операциялар көбейген. Ондай операцияларды жеке адамның қалтасы көтермейді. Сондықтан МӘМС енгізілгелі бері біздің қаржылық әлеуетіміз жақсарып, Шымкент қаласында қаншама пациент өлім аузынан аман қалды. Шымкент қаласы бойынша 8 млрд қаржы бөлінген. Скрининг өткізу үшін. Оның ішінде жүрек аурулары да бар. Ол жерде обыр аурулары да бар. Қант диабеті аурулары.

Десе де дәрігерлер денсаулықты күтіп, салауатты өмір салтына мән беруге үндейді. Себебі соңғы жылдары жүрек аурулары жасарып барады.

© «24kz» телеарнасы