Көшпенділер ойындары алдында көкпарға VAR жүйесі енгізілді (видео)

V Дүниежүзілік көшпенділер ойыны алдында көкпарға VAR жүйесі енгізілді,-деп хабарлайды «24kz» телеарнасы.

Айтулы бәсекенің абыройлы әрі әділ өтуі үшін ат спортына заманауи шешімдер қабылданды. Бұл туралы Шымкентте өтіп жатқан халықаралық семинар-тренингте айтылды. Төрешілердің кәсіби біліктілігін жетілдіру жиынына еліміздің қазылары мен Қырғызстан, Өзбекстан, Моңғолия, Тәжікстан, Ресей, Түркия, Мажарстан, Грузия және Пәкістан мемлекеттерінен 35 маман шақырту алды. Олар ұлттық спортты жоғары деңгейде өткізу үшін 4 күн бойы теориялық және практикалық сабақтарға қатысады. Жалпы ойынның жаңа ережесі мен рұқсат етілген және тыйым салынған әдіс-тәсілдер түсіндіріледі.

Айта кетейік, көкпар додасына қатысуға 12 мемлекеттің құрама командасы атынан өтініш берілді.

Ғани Ахметбаев, көкпардан V Дүниежүзілік көшпенділер ойындарының бас төрешісі:
— Қайта көру мүмкіндігі жаңа ережеге кіріп отыр. Содан кейін дрон операторы, қосымша комментатордың қасында арнайы мамандар қызмет жасайды. Келіспеген жағдайда, додама жағдайда тоқтатып, дұрыс немесе дұрыс емес шешімдердің бәрін айта алатын үлкен мүмкіндіктеріміз бар.

Мұратбек Қыпшақбаев, V Дүниежүзілік көшпенділер ойындарын өткізу және дайындау дирекциясы басшысының орынбасары:
— Өзіміздің ұлттық құрама командамыз бен Қырғызстан Республикасының ұлттық құрама командасы нақты өздерінің аттарымен келетін болды. Біз қалған қатысушыларға ұйымдастыру дирекциясы толық атпен қамтамасыз етеміз. Одан бөлек, ертоқымдар мен әбзелдермен, киімдерді дирекция қамтамасыз ететін болады.

Еске салсақ, өткен айда Шымкентте алыптар арасында V Дүниежүзілік көшпенділер ойынына іріктеу кезеңі өткізілді.

Салмағы 90 келіден асатын жауырынды жігіттер найза лақтырып, 100 келі тартатын бөрене көтерді. Ауыр тасты құм үстінде алып жүріп, арба тартты. Жарысқа барлығы 15 спортшы қатысты. Олар бес кезең бойынша білек күшін сынап, төзімділігі мен ептілігін байқатты. Қазалардың шешім шығаруына толағайлардың өнері мен көрермен қошеметі де әсер етті. Үздік үштіктен бөлек болашағынан үміт күттіретін қатысушыларға сый-сияпат жасалды. Бас жүлде иегеріне жаз айының соңына қарай өтетін республикалық жарасқа жолдама берілді.

— Болашақ жас, мықты Қажымұқандарды шығаруға ниет жасап жатырмыз. Жеңіп шыққаны сол Астана қаласындағы «Қазақстан додасына» қатысады. Қазақстан додасында жеңіп шыққан палуан ол әлемдік V Дүниежүзілік көшпенділер ойындарына қатысады,-деді «Толағай» алыптар сайысының авторы Тимур Дәулетбақұлы.

© «24kz» телеарнасы