Xnews — ақпарат агенттігі Әлем және Қазақстанның соңғы жаңалықтары
Аудан әкімі Мақсат Таңғатаровтың төрағалығымен ауданның апталық мәжілісі болып өтті. Мәжіліске аудан әкімінің орынбасарлары, кеңесшілері, дербес бөлім басшылары, ауылдық округ әкімдері және тиісті сала басшылары қатысты,-деп хабарлайды Xnews.kz ақпарат агенттігі Сауран ауданы әкімдігінің баспасөз қызметіне сілтеме жасап.
Мәжілістің күн тәртібінде 3 мәселе қаралды. Онда шомылу маусымының басталуына байланысты судағы қауіпсіздік шаралары туралы аудандық төтенше жағдайлар бөлімінің басшысы Мұхтар Қуанышбаев, инвестиция көлемін арттыру бойынша атқарылған жұмыстардың барысы бойынша кәсіпкерлік және туризм бөлімінің басшысы Сұлтанғали Шакиров, оқушылардың жазғы демалысын ұйымдастыру туралы аудандық білім бөлімінің басшысы Ақмарал Батырбекова баяндама жасады.
Аудандық төтенше жағдайлар бөлімінің басшысы Мұхтар Қуанышбаевтың хабарлауынша елімізде шомылу маусымы ресми түрде маусым айының 1-нен басталады. Төтенше жағдайлар бөлімі тарапынан 2024 жылғы жазғы шомылу маусымында аудан аумағында су айдындарында азаматтардың қауіпсіздігін қамтамасыз ету жөнінде іс-шаралар жоспары бекітілген.
Қазіргі таңда 6 ауылдық округ аумағына судағы қауіпсіздік және жазғы өрт қауіпсіздігі бойынша баннер ілінген. Сонымен қатар, «Судағы қауіпсіздік» тақырыбы бойынша аудандық және ауылдық округтердің әлеуметтік желілерде бейнероликтер орналастырылып, тұрғындарға алдын алу бағытында тиісті жұмыстар жүргізіліп жатқанын атап өтті.
Бұдан бөлек, кәсіпкерлік және туризм бөлімінің басшысы Сұлтанғали Шакировтың мәлімдеуінше бекітілген кешенді жоспарға сәйкес, 2024 жылға негізгі капиталға салынған инвестиция көлемі 42,0 млрд теңге болып нысаналы индикатор белгіленген. 2024 жылдың қаңтар-сәуір айына аталған жоспар 89,9 пайызға орындалған.
Мәжілісті қорытындылыған аудан әкімі Мақсат Таңғатаров күн тәртібіндегі қаралған мәселелер бойынша тиісті бөлімдер мен ауылдық округ әкімдеріне нақты тапсырмалар беріп, орындалуы тұрақты бақылауда болатынын жеткізді.
