Xnews — ақпарат агенттігі Әлем және Қазақстанның соңғы жаңалықтары
Кентауда қала күніне орай «Жаса, жайна ару қалам – Кентауым» атты салтанатты шарасы өтті. Мереке аясында 20-ға жуық маңызды шара ұйымдастырылып, Ынтымақ алаңында кентаулық өнерпаздардың қатысуымен өткен концертпен қорытындыланды.
Салтанатты шараны Кентау қаласы әкімінің міндетін атқарушы Қуаныш Искаков пен қалалық маслихат төрағасы Қабылан Елеусізов ашып берді.
– Кентау қаласының күнімен шын жүректен құттықтаймын! Осы жылдар аралығында қаланың басынан көптеген жағдайлар өтті. Қаншама ақын, композиторлар әнімен тербетті. Сондай ұлылардың ізі қалған, әсем де сұлу қаламыз біз үшін ыстық мекен. Кентау қаласының тарихы еліміздегі пайдалы қазбаларды игерумен тығыз байланысты. Мен осы қаланың тұрғыны ретінде, қала тарихындағы кен өндіруде әлемдік рекордтарды орнатқанын әрдайым мақтанышпен айтамын. Бұл кентаулықтардың символына айналған таңба секілді, ұрпақтан ұрпаққа айтылып отыратынына кәміл сенемн, – деді Қуаныш Искаков.
Мерекелік шарада қаланың дамуы жолында еселі еңбегі айрықша 10 азаматқа «Қаланың құрметті азаматы» атағы берілсе, бірқатар азаматтар «Қалаға сіңірген еңбегі үшін» төсбелгісімен және қала әкімінің «Алғыс хатымен» марапатталды.
Мәдениет сарайының өнерпаздары алаңға жиналған кентаулықтарға ерекше көңіл-күй сыйлады. Салтанатты кеш соңы отшашуға ұласып, тұрғындарды ерекше күйге бөледі.
Түркістан облысы әкімінің баспасөз қызметі
